პარტია "თავისუფალი საქართველოს" ნაძალადევის მაჟორიტარი დეპუტატობის კანდიდატი პარტიის ლიდერი კახა კუკავა იქნება.
მაჟორიტარი კანდიდატობის კანდიდატი დღეს ნაძალადევის შტაბში პარტიის თანათავმჯდომარე დიმიტრი ლორთქიფანიძემ წარადგინა.
როგორც მან აღნიშნა, უმთავრესი ამოცანა, რასაც "თავისუფალი საქართველო" შუალედურ არჩევნებში ისახავს მიზნად, კოაბიტაციად წოდებული ფარსის დასრულებას გულისხმობს.
მისი თქმით, "ნაციონალური მოძრაობა", როგორც დანაშაულებრივი რეჟიმი უნდა გასამართლდეს და მისი ადგილი პარლამენტში კონსტრუქციულმა ოპოზიციამ - "თავისუფალმა საქართველომ" უნდა დაიკავოს.
"კიდევ ერთხელ მოვუწოდებთ "ქართულ ოცნებას" მხარი დაუჭიროს ოპოზიციის კანდიდატებს ამ არჩევნებში, მით უფრო რომ "თავისუფალი საქართველო" იყო ერთადერთი ძალა 2012 წლის 1 ოქტომბრის არჩევნებში, რომელმაც ღიად დაუჭირა მხარი ბიძინა ივანიშვილს", - განაცხადა ლორთქიფანიძემ.
მისივე თქმით, უახლოეს დღეებში "თავისუფალი საქართველო" საარჩევნო პროგრამას გამოაქვეყნებს.
