დღეს, 28 მარტს, ბათუმში საქართველო-აზერბაიჯანი-თურქეთის საგარეო საქმეთა მინისტრების სამმხრივი შეხვედრა გაიმართება. ამის შესახებ ჟურნალისტებთან საგარეო საქმეთა მინისტრის მოადგილემ დავით ჯალაღანიამ ორშაბათის ტრადიციულ ბრიფინგზე განაცხადა. როგორც საგარეო საქმეთა მინისტრის მოადგილემ განამარტა ბათუმში დაგეგმილ შეხვედრას, ეს არის მეორე შეხვედრა სამმხრივ ფორმატში, რომელსაც საფუძველი ჩაეყარა 2012 წლის 8 ივნისს, თურქეთის ქ. ტრაპიზონში სამი ქვეყნის საგარეო საქმეთა მინისტრების მიერ ხელმოწერილი ერთობლივი დეკლარაციით.
,,სამი ქვეყნის საგარეო საქმეთა მინისტრები რეგულარულად ხვდებიან და განიხილავენ სამი ქვეყნის ურთიერთთანამშრომლობის მნიშვნელოვან მიმართულებებს ეკონომიკის, ენერგეტიკის, ინფრასტრუქტურის, ტრანსპორტის, კულტურისა და ჰუმანიტარულ სფეროებში.საგარეო საქმეთა მინისტრების სამმხრივ შეხვედრაზე მინისტრები მიიღებენ უწყებათაშორისი თანამშრომლობის სამოქმედო გეგმას 2013-2015 წლებისათვის. აღნიშნული გეგმა შემუშავდა შესაბამისი უწყებების მიერ და ითვალისწინებს სამი ქვეყნის კომპეტენტური სამინისტროების მიერ, ერთობლივი პროექტებისა და კონკრეტული ინიციატივების განხორციელებას სხვადასხვა მიმართულებით. სამოქმედო გეგმა მოიცავს ისეთ მნიშვნელოვან სფეროებს, როგორიც არის: ეკონომიკა, ენერგეტიკა, გარემოს დაცვა, კულტურა, განათლება, სპორტი და ახალგაზრდობა. სამი ქვეყნის საგარეო საქმეთა სამინისტროები განახორციელებენ სამოქმედო გეგმის შესრულების კოორდინაციასა და მონიტორინგს. შეხვედრის დასასრულს, საქართველოს, აზერბაიჯანისა და თურქეთის საგარეო საქმეთა მინისტრები ხელს მოაწერენ შემაჯამებელ ოქმს", -განაცხადა დავით ჯალაღანიამ