"ნაციონალურმა მოძრაობამ" ცენტრალურ საარჩევნო კომისიაში განაცხადი შეიტანა და შუალედურ არჩევნებში თავისი კანდიდატები დაარეგისტრირა.
ცესკო-ში განაცხადი "ნაციონალური მოძრაობის" წევრმა აკაკი მინაშვილმა შეიტანა.
როგორც მან აღნიშნა, მაჟორიტარი დეპუტატობის კანდიდატები თავიანთი პროფესიონალური ნიშნით არიან შერჩეულნი.
მისი თქმით, მათ საქართველოს მოქალაქეების საკეთილდღეოდ საქმის კეთების ძალიან დიდი გამოცდილება აქვთ.
"ჩვენ ვართ მოწმეები იმისა, რომ "ქართული ოცნება" არ ასრულებს საკუთარ დაპირებებს, რომლებიც მან ძალიან უხვად დაარიგა. ერთადერთი შესაძლებლობა, რომ მინიმალურად მაინც მოხდეს ამ პირობების შესრულება არის ის, რომ იყოს აქტიური ოპოზიცია, აქტიური ადგილობრივი დეპუტატები და სწორედ ამ ნიშნით არიან ეს ადამიანები შერჩეულნი", - განაცხადა მინაშვილმა.
მისივე თქმით, გამარჯვების შემთხვევაში, ისინი შეძლებენ შეაჩერონ ის პრობლემები, რაც საქართველოს ევროინტეგრაციის პროცესში ახალი ხელისუფლების გამო აქვს.
27 აპრილს დაგეგმილ შუალედურ არჩევნებში პარტიის სახელით კენჭს ბაღდათში - ვლადიმერ წიქორიძე, სამტრედიაში - ემზარ შუბლაძე და თბილისში - პაპუნა დავითია იყრიან.
