"ქართული დასის" ლიდერის ჯონდი ბაღათურიას განცხადებით, მას ის გავლენა აშფოთებს, რომელიც პოლიტიკურ გადაწყვეტილებებზე "რესპუბლიკურმა პარტიამ" მოიპოვა.
როგორც მან "მაესტროს" პრესკლუბში აღნიშნა, შუალედურ არჩევნებში ძალიან საინტერესო ვითარება შეიქმნა, რადგან ერთი მანდატი არაფერს ნიშნავს არც კოალიცია "ქართული ოცნებისთვის" და არც "ნაციონალური მოძრაობისთვის".
მისი თქმით, ქართულ ოცნებას" 94 მანდატი აქვს, საკონსტიტუციო ცვლილებები ჩავლილია, ამიტომ მას აღარ სჭირდება ერთი მანდატის არც დამატება და არც დაკლება.
"არც "ნაციონალური მოძრაობისთვის" არაფერს არ ნიშნავს და სიმართლე გითხრათ არც "ქართული დასისთვის", გარდა იმისა, რომ ტრიბუნა და ასპარეზი მიეცემა უფრო მაღალი, სხვა არაფერს არ ნიშნავს. სახელმწიფოს მართვაზე და პოლიტიკურ პროცესებზე ზეგავლენის თვალსაზრისით, ამას არსებითი მნიშვნელობა არ აქვს", - განაცხადა ბაღათურიამ.
მისი თქმით, ის, რომ "ნაციონალურ მოძრაობასთან" მისი ურთიერთობის პრობლემები არსებობს ეს ადრეც ცხადი იყო, თუმცა არსებობს პარტიათა ჩამონათვალი, რომლებიც როცა მისი საკითხი დგება მუდმივად ერთიანდებიან და "ქართული დასის" წინააღმდეგ რაღაცის შეცვლას ერთობლივად ცდილობენ.
ამასთან, ბაღათურიას განცხადებით, პარლამეტის წევრები სამ ნაწილად იყოფიან - ერთი სრულიად გონებაჩლუნგები, რომლებიც დაკავებულები არიან საკუთარი ნათესავების სამსახურში მოწყობით. მისი თქმით, ასეთები ცოტანი არიან.
"მეორე ნაწილი - ვიწრო პარტიულ ეგოიზმში გამოკეტილები, რომლებმაც უკვე ძალიან ნაადრევად დაიწყეს ფიქრი ივანიშვილის გარეშე პარტიულ გაძლიერებაზე, რაც თავისთავად დაასუსტებს ხელისუფლებას და მესამე ნაწილი - ჭკვიანი და სინდისიანი ადამიანები, რომლებიც დღეს სამწუხაროდ, ჩრდილში არიან", - განაცხადა ბაღათურიამ.
მისი თქმით, რეალურად, გადაწყვეტილებებს "რესპუბლიკური პარტია" იღებს. ეს არჩევნებამდე გამოჩნდა, თუმცა მათი გავლენა ახლა უფრო გაიზარდა.
"მანდატი არაფერს არ წყვეტს. მე არ მიღირდა ამ მანდატისთვის ბრძოლა, მაგრამ მე მაღელვებს ის გავლენა, რაც მოიპოვა პოლიტიკურ გადაწყვეტილებებზე "რესპუბლიკურმა პარტიამ"", - განაცხადა ბაღათურიამ.
2012 წლის 1 ოქტომბრის საპარლამენტო არჩევნებში ნაძალადევის რაიონში, ბაღდათსა და სამტრედიაში კოალიცია „ქართული ოცნების" სიით გამარჯვებულ დეპუტატებს - თეა წულუკიანს, კახა კალაძესა და არჩილ კბილაშვილს პარლამენტის წევრის უფლებამოსილება საკანონმდებლოდან აღმასრულებელ ხელისუფლებაში გადასვლის გამო შეუწყდათ. ამის გამო, სამივე ოლქში ხელახალი შუალედური არჩევნები 27 აპრილს ჩატარდება.
