საქართველოს პრეზიდენტის მიხეილ სააკაშვილის განცხადებით, თუ "საერთო სასამართლოების შესახებ" კანონს იმ ფორმით მიიღებენ, რა ფორმაც ახლა არსებობს, ევროპულ პერსპექტივას ჩამოვშორდებით.
როგორც მან ახალქალაქიდან დაბრუნების შემდეგ აღნიშნა, კანონთან დაკავშირებით მოლაპარაკებები აუცილებელია.
მისი თქმით, პარლამენტის თავმჯდომარე დავით უსუფაშვილსა და საპარლამენტო უმცირესობის ლიდერ დავით ბაქრაძეს ამ საკითხზე მოლაპარაკებები კარგად გამოსდით.
"უმცირესობის ლიდერსა და პარლამენტის თავმჯდომარეს შორის წარიმართა გუშინ ერთობ სასარგებლო კონსულტაციები. მას შემდეგ, რაც ჩვენ შევთანხმდით კონსტიტუციის არა მხოლოდ შინაარსზე, არამედ პროცედურის ფორმაზე, რაც მართლა მისასალმებელი მოვლენა იყო პარლამენტში, კარგი იქნებოდა, რომ სხვა ძალიან მნიშვნელოვან კანონებზე იგივე გაგრძელდეს", - განაცხადა სააკაშვილმა.
მისი თქმით, "საერთო სასამართლოების შესახებ" კანონი ა ქართული დემოკრატიისთვის სასიცოცხლო მნიშვნელობისაა.
სააკაშვილის განცხადებით, თუ იმ ფორმით ძალით გაიტანეს, როგორც ახლა არის, საქართველოში შეგვიძლია სამუდამოდ დავემშვიდობოთ თავისუფალი სასამართლოს იდეასაც კი.
"მთელი ეს წლები მუშაობის შედეგად და არჩევნების შედეგად გაჩნდა ამ კომბინაციის შანსი, რომ საქართველოს მოქალაქეები იყვნენ დაცულნი სწორედ თავისუფალი სასამართლოთი, ახლა ამის მოკვლის დრო არ არის. თუ ამ ფორმით იქნება ეს კანონი მიღებული ყოველგვარი მიკიბვ-მოკიბვის გარეშე შეგვიძლია ვთქვათ, რომ საქართველო სამუდამოდ თუ არა, ყოველ შემთხვევაში ვილნიუსის სამიტზე ნამდვილად დაემშვიდობება ევროპულ პერსპექტივას", - განაცხადა სააკაშვილმა.
მისივე თქმით, ახლა, როგორც არასდროს საჭიროა ერთობლივად მუშაობა, რადგან ყველა პარტიის ინტერესებში უნდა იყოს, რომ სასამართლო იყოს თავისუფალი.
პრეზიდენტის განცხადებით, უსუფაშვილი და ბაქრაძე ძალიან კარგად მუშაობენ, თუმცა ისიც მზადაა, რომ პროცესში აქტიურად ჩაერთოს.
