საქართველოს პრეზიდენტმა მიხეილ სააკაშვილმა დღეს ბაგრატის ტაძრის აღდგენაში მონაწილე არქიტექტორები ბრწყინვალების საპრეზიდენტო ორდენით დააჯილდოვა.
როგორც მან დაჯილდოების ცერემონიაზე აღნიშნა, ტაძრის აღდგენისთვის შესრულებული სამუშაოებით აღფრთოვანებულია, რისთვისაც მან ყველას მადლობა გადაუხადა.
მისი თქმით, დღეს სრულიად უსაფუძვლოდ უმტკიცებენ, რომ ბაგრატი არ არის ძველი ტაძარი.
"ძველი არა, ეს იყო რუსებისა და საბჭოთა კავშირისგან მოხვეული ახალი ფორმები, რომელიც რაღაც ნაწილი გახდა ჩვენი ისტორიის. თუ ვილაპარაკებთ სიძველეზე - იყოს ზუსტად ის მწვანე ფერი და ესეც მშვენივრად იციან არქიტექტორებმა და ხელოვნებათმცოდნეებმა, ვინც ამაზე მუშაობს. ამიტომ, ასეთი კლიშეებით, ასეთი ცრუ სტერეოტიპებით, ასეთი მოგონილი ხანდახან და ზოგჯერ მცდარი წარმოდგენებით ხდებოდა და დღესაც სამწუხაროდ, ხდება აღმშენებლობის იდეასთან ბრძოლა", - განაცხადა სააკაშვილმა.
მისი თქმით, ის, რაც ჩვენმა დამპყრობელმა ჩაგვინერგა ესაა - ქართველ ხალხს არ უნდა ჰქონდეს აღმშენებლობის არც სურვილი, არც ნიჭი და არც უნარი.
"ამიტომ არის, რომ თუ საფრთხე არის საქართველოს უკან დაბრუნების ერთ-ერთი შემადგენელი კომპონენტი არის მშენებლობის შეჩერება და უკვე აშენებულის დანგრევაზე საუბარიც კი. ეს არის ის ფილოსოფია, რასაც ჩვენ გვახვევდნენ, რომ ჩვენ თვითონ არ შეგვიძლია აღმშენებლობა. ბოლო 9 წელიწადში, განსაკუთრებით, ბოლო 5-6 წელიწადში საქართველომ მთლიანად მოსპო და დაანგრია ეს სტერეოტიპი", - აღნიშნა პრეზიდენტმა.
მისივე თქმით, ბაგრატი მომავალ თაობას დარჩება. ბაგრატი დარჩება ასევე, არა მხოლოდ ჩვენი კულტურის, არამედ საეკლესიო მომავლის ნაწილად.
პრეზიდენტის განცხადებით, ქუთაისში იმისთვისაც ივლის ხალხი, რომ ბაგრატი დაათვალიეროს.
მიხეილ სააკაშვილმა არქიტექტორებს საერთაშორისო პრემიის მიღება და დაფასება მიულოცა.