საქართველოს კათოლიკოს-პატრიარქმა, უწმინდესმა და უნეტარესმა ილია მეორემ დღეს, საკვირაო ქადაგებაზე მართლმადიდებლობის ზეიმზე იქადაგა.
როგორც მან ბრძანა, დღევანდელ დღეს მართლმადიდებლობის ზეიმი ეწოდება, რომელიც მე-9 საუკუნეში დაწესდა და ძირითადად, ხატის თაყვანისცემას ეხება.
მისი თქმით, ყოველი ხატი ეს არის სარკმელი ზეცად და ის ამა თუ იმ წმინდანს მოგვაგონებს.
"ხატის თაყვანისცემა ღვთისგან დალოცვილია და ივერიის ყოვლადწმინდა ღვთისმშობლის ხატი სწორედ ამ დროს იყო დაშვებული ზღვაში. გვწამს, რომ ის წმინდა ხატი დაბრუნდება საქართველოში. ეს დღესასწაული თვალსაჩინოა იმით, რომ ამ დღეს მსოფლიო პატრიარქმა დიმიტრიოს პირველმა და ეკლესიის სინოდმა დაამტკიცეს ჩვენი უძველესი ავტოკეფალია, მეთაურის - პატრიარქის წოდება"- ბრძანა პატრიარქმა.
უწმინდესის თქმით, ღვთის ძალა და მადლი მართლმადიდებლობას განამტკიცებს.
"ამასთან, უნდა გვესმოდეს რა არის ეს. მართლმადიდებლობა არის ის სარწმუნოება, რომელსაც მთელი მსოფლიო აღიარებდა, როდესაც არ იყვნენ არც კათოლიკეები, არც პროტესტანტები და არც სხვები. ჩვენ ამის მფლობელები ვართ და ამას ვცემთ თაყვანს. ავტოკეფალია ეს არის ეკლესიის დამოუკიდებლობა, თავისუფლება. მთელი ქართული ლიტერატურა და კულტურა ქრისტიანულ სარწმუნოებაზე - ავტოკეფალიაზე არის დაყრდნობილი. ჩვენ ვერც კი წარმოგვიდგენია, რანი ვიქნებოდით ავტოკეფალიის, ქრისტიანობის გარეშე", - ბრძანა უწმინდესმა.
პატრიარქმა მრევლს დღევანდელი დღე მიულოცა და რამდენიმე სასულიერო პირი დააჯილდოვა.
