"ერთიანი ნაციონალური მოძრაობის" გენერალური მდივანი ვანო მერაბიშვილი მთავრობის სოფლის მეურნეობის პროგრამას გაუგებარს უწოდებს.როგორც მან დღევანდელ პრესკონფერენციაზე აღნიშნა, საბოლოოდ დარწმუნდა, რომ დღევანდელი მთავრობის სოფლის მეურნეობის პროგრამა ძალიან ცუდადაა მომზადებული.
"არის ძალიან ცუდად მომზადებული, ძალიან ბუნდოვანი და გაუგებარი. პრაქტიკულად, მე ვერ ვნახე ვერც ერთი ადამიანი, ვინც მკაფიოდ იცის როგორ შეიძლება ამ ე.წ ბარათების გამოყენება. არის ორეტაპიანი პროცედურა. ჯერ მოქალაქე ვალდებულია მოხნას ვაუჩერი პირველი ნაწილით და შემდეგ თუ ამას მოხნავს მიწას შემდეგ მიიღოს სასუქი, ან ტექნიკა შეიძინოს", - განაცხადა მერაბიშვილმა.
მისი თქმით, მოსახლეობის აბსოლუტურმა უმრავლესობამ არ იცის და ვერ იყენებს ამ ბარათს.
მერავიშვილის განცხადებით, მას აქვს ეჭვი, რომ ქართველი გლეხების დიდი ნაწილი დაპირებულ და ბიუჯეტიდან გამოყოფილ 400-ლარიან დახმარებას ვერ მიიღებს.
"ამიტომ მე მაქვს წინადადება მთავრობასთან. იმის გამო, რომ მთავრობამ დროზე ვერ მოასწრო ბარათების დარიგება, იმის გამო, რომ ბევრ სოფელში, ბევრ გლეხს უკვე დამუშავებული ჰქონდა საკუთარი ნაკვეთები, ვთავაზობ - მიეცეს გლეხებს საშუალება გაანაღდონ ეს ბარათები ბანკებში და თვითონ გადაწყვიტონ რაში გამოიყენონ ეს ბარათები", - აღნიშნა მერაბიშვილმა.
მისივე თქმით, კარგი იქნება, რომ მოქალაქეებმა არ დაკარგონ ის შემოსავალი, რომელიც ბიუჯეტიდანაა გამოყოფილი.
მერაბიშვილის განცხადებით, საქართველოს ძალიან ბევრი ფერმერი ვერ, ან არ ისარგებლებს ამ ბარათით, მას კერძო პირები - სამინისტროს თანამშრომლები გაანაღდებენ და მოქალაქეებისთვის ეს ფული დაიკარგება.
