პრინცესა დაიანას ათი კაბა, რომელიც აუქციონზე იყო გამოტანილი, 1,15 მილიონ დოლარად გაიყიდა. ამის შესახებ ლონდონის აუქციონის სახლი Kerry Taylor Auctions საკუთარ საიტზე იუწყება.
ყველაზე ძვირად ის კაბა გაიყიდა, რომელშიც პრინცესა 1985 წელს, თეთრ სახლში მიღებაზე მსახიობ ჯონ ტრავოლტასთან ცეკვავდა. ამ კაბის ღირებულებამ 300 ათასი დოლარი შეადგინა. კაბა ინკოგნიტო ინგლისელმა იყიდა, მეუღლისთვის სიუპრიზის გასაკეთებლად.
ორ სხვა ძვირადღირებულ კაბად იქცა ხავერდის კაბა, რომელში გამოწყობილი პრინცესა დაიანა ფილმის პრემიერას 1985 წელს დაესწრო და მეორე კი, საღამოს შავი კაბა ჟურნალის ფოტოსესიისთვის.
ლონდონის აუქციონზე წარმოდგენილი კაბები თავად პრინცესამ 1997 წელს, პრინც ჩარლზთან დაშორების შემდეგ გაყიდა, ხოლო მიღებული შემოსავალი საქველმოქმედო მიზნებისთვის გამოიყენა. კაბები ამერიკელმა მორინ პოპეკ დანკელმა შეიძინა, რომელმაც თავის მხრივ ისინი 2011 წელს გაყიდა. მაშინ პრინცესას კაბების კოლექცია გაცილებით ძვირად იყო შეფასებული.
