დღეს, 18 მარტს, საკონსტიტუციო ცვლილებებზე კენჭისყრის ზუსტი თარიღი გამოცხადდება. კონსტიტუციაში შესატან ცვლილებებს, რომლის ავტორიც პარლამენტის 78 წევრია იურიდიულ საკითხთა კომიტეტის ხვალინდელ სხდომაზე პირველი მოსმენით განიხილავენ.
საქართველოს პარლამენტის თავმჯდომარის დავით უსუფაშვილის განცხადებით, კენჭისყრამდე ცვლილებების ტექსტი ყველა დაინტერესებულ მხარესთან იქნება შეჯერებული.
„საკონსტიტუციო ცვლილებებზე კენჭისყრის ზუსტი თარიღი გამოცხადდება 18 მარტს, როდესაც გაიმართება პარლამენტის ბიუროს სხდომა. მთავარი საკონსტიტუციო ცვლილებების ტექსტთან დაკავშირებით შედგა საჯარო განხილვის კომისიის შემაჯამებელი სხდომა, ამ დღეებში ჩატარდება იურიდიული კომიტეტის სხდომა, რომელიც უკვე შეაჯერებს იმ ტექსტს, რომელიც დეკემბერში იქნა ინიცირებული. ჩვენ ვცდილობთ დავითვალისწინოთ ამ ტექსტთან დაკავშირებით სამოქალაქო საზოგადოების და ოპოზიციიის ცალკეული წარმომადგენლების მოსაზრებები. მათ შორის პარლამენტის დათხოვნა-არდათხოვნის შესაძლებლობასთან დაკავშირებით ბოლო ექვსი თვის განმავლობაში. ასე რომ, ეს ტექსტი იქნება შეჯერებული გამოთქმული მოსაზრებების საფუძველზე", - განაცხადა უსუფაშვილმა.
საკონსტიტუციო ცვლილებები პრეზიდენტისთვის კონსტიტუციური უფლების შეზღუდვას ეხება, რომელიც მას პარლამენტის თანხმობის გარეშე, მთავრობის დათხოვნისა და ახლი მთავრობის დაკომპლექტების შესაძლებლობა აქვს.
