გარდაცვლილი ბუტა რობაქიძის მამა სოსო რობაქიძე თავდაცვის ყოფილ მინისტრ ირაკლი ოქრუაშვილს ურთიერთგამომრიცხავი განცხადების გაკეთებაში ადანაშაულებს.
სოსო რობაქიძემ დღეს "პრაიმ-ტაიმის" პრესკლუბში ოქრუაშვილის მიერ გადაცემა "მატრიცაში" გაკეთებული განცხადება გაიხსენა, სადაც მან რობაქიძის მკვლელობას მისთვის ყველაზე დიდი ლაქა უწოდა.
მისი თქმით, დღეს ოქრუაშვილი რობაქიძის საქმესთან კავშირს უარყოფს.
"ურთიერთგამომრიცხავია. ჯერ ამბობს, რომ დიდი შავი ლაქაა ცხოვრებაში რობაქიძის საქმეო. შემდეგ ამბობს, რომ თურმე არ ყოფილა ის საქმის კურსში და რაღაცა ჯარის შექმნაში იღებდა მაშინ მონაწილეობას, ჯარის გაძლიერებაში და შს მინისტრი იყო კიდევ ერთი ორი კვირა-ოცი დღე მას შემდეგ. ეს არის სიცრუე", - განაცხადა სოსო რობაქიძემ.
მისი თქმით, ოქრუაშვილმა, თავიდან თქვა, რომ ზურაბ ჟვანია მოკლულიაო, რამდენიმე დღის წინ კი თქვა, რომ ჟვანია მოკლული არ არის.
ამასთან, ბუტა რობაქიძის მამა საგამოძიებო ორგანოებს ობიექტურ გამოძიების ჩატარებას და დამნაშავეების უმკაცრესად დასჯას სთხოვს.