საქართველოს პარლამენტის თავმჯდომარე დავით უსუფაშვილი ამერიკის შეერთებულ შტატებში სენატორ ჯონ მაკკეინს შეხვდა.
მხარეებმა საქართველოსა და აშშ-ს შორის ურთიერთობების შესახებ ისაუბრეს.
ჯონ მაკკეინმა საქართველოსადმი კეთილგანწყობა კიდევ ერთხელ დაადასტურა.
როგორც შეხვედრის შემდეგ პარლამენტის თავმჯდომარემ აღნიშნა, ეს იყო ძალიან კეთილგანწყობილი, საქმიანი საუბარი, მათ შორის იმაზეც, თუ რა ნაბიჯებია გადასადგმელი კოაბიტაციის პროცესის სწორად და ნორმალურად დასასრულებლად.
"ის თვლის, რომ სავაჭრო ურთიერთობები ეს აუცილებელია. ამერიკას აქვს სავაჭრო ურთიერთობა რუსეთთან და რატომ არ უნდა ჰქონდეს საქართველოს? იმიტომ, რომ ის პრობლემა, რაც საქართველოს აქვს რუსეთთან ეს არ არის მხოლოდ ქართველების პრობლემა. ეს არის მთელი დემოკრატიული საზოგადოების პრობლემა და ჩვენ ეს უნდა გავითავისოთ და მოვიქცეთ ისე, როგორც იქცევა დემოკრატიული სამყარო", - განაცხადა უსუფაშვილმა.
მისი თქმით, ეს მოქცევა ნიშნავს მოქნილობას, შედეგზე ორიენტირებულ ქმედებებს და არა რამე სხვას.
დავით უსუფაშვილი ქართულ დელეგაციასთან ერთად, 5-დღიანი ვიზიტით ვაშინგტონს 11 მარტს ეწვია. მისი პირველი ოფიციალური ვიზიტი დღეს დასრულდება.