სპორტისა და ახალგაზრდულ საქმეთა მინისიტრი ლევან ყიფიანი პრემიერ-მინისტრის გადაწყვეტილებას მთავრობის წევრებისთვის ხელფასების შემცირების თაობაზე ლოგიკურს უწოდებს. როგორც ჟურნალისტებთან ყიფიანმა მთავრობის სხდომის დაწყებამდე განმარტა წინა ხელისუფლების დროს მინისტრებს საკმაოდ მაღალი ხელფასები ჰქონდათ.
,, ჩვენ თუ იმას გავითვალისწინებთ როგორი ხელფასები ჰქონდათ ჩვენ წინამორბედებს და როგორ ხელფასს იღებდნენ, ეს ალბათ სასაცილოც იქნება. უბრალოდ აქ პასუხისმგებლობაზეა ლაპარაკი, რაოდენ დიდი პასუხისმგებლობა აკისრიათ მინისტრებს. ამიტომ ეს გადაწყვეტილება აბსოლუტურად ლოგიკური უნდა იყოს", _ განაცხადა ყიფიანმა.
შეგახსენებთ, რომ საქართველოს მთავრობის წევრთა ხელფასი 12%-ით მცირდება. პრემიერ-მინისტრის გადაწყვეტილებით, მინისტრების ხელფასებისთვის, გასულ წლებთან შედარებით, ბიუჯეტიდან გაცილებით ნაკლები თანხა დაიხარჯება და ეს ინფორმაცია საზოგადოებისთვის აბსოლუტურად გამჭვირვალეა.
მთავრობა უარს ამბობს ყოფილი ხელისუფლების მიერ დამკვიდრებულ პრაქტიკაზე, როდესაც მინისტრები ყოველ თვეში, ან თვეში რამდენჯერმე, თვითონვე იწერდნენ პრემიებს. მინისტრები, ყოველთვიურად, ყოველგვარი სახელფასო დანამატით, ხელზე აიღებენ 6300 ლარს. პრემია კი, პრემიერ-მინისტრის გადაწყვეტილებით, წელიწადში ერთხელ გაიცემა.
