საქართველოს პრეზიდენტი მიხეილ სააკაშვილი კოტე კუბლაშვილის შესახებ ივანიშვილის განცხადებას პასუხობს. „ადამიანის პირად ცხოვრებაში უხეში ჩარევა, კონსტიტუციით აღიარებული პირადი ცხოვრების ხელშეუხებლობის უფლების დარღვევა, პირადი პრობლემებით შანტაჟი და სპეკულირება 90-იანი წლების დასაწყისის ყაჩაღური, რუსული, ოლიგარქიული, კაპიტალიზმის მეთოდებს უფრო ჰგავს და არა 21-ე საუკუნის დემოკრატიული, ევროპული მთავრობის მოქმედებას.
ეს საქციელი უკვე ახალი მთავრობის მოქმედების ტენდენციად იქცა. მე ვგმობ ამ ფაქტს და კიდევ ერთხელ მოვუწოდებ პარლამენტის უმრავლესობას უფრო მეტი გულისხმიერებით მოეკიდოს ჩემს მიერ ინიცირებულ კანონპროექტს პირადი ცხოვრების ხელშეუხებლობის შესახებ", - აღნიშნავს სააკაშვილი.
პრემიერ-მინისტრის ინფორმაციით, უზენაესი სასამართლოს თავმჯომარეს კოტე კუბლაშვილს ჰქონდა ძალიან მძიმე დაავადება და მას პრეზიდენტი დაეხმარა, რის გამოც კუბლაშვილი სააკაშვილისგან თავს მუდმივად დავალებულად გრძნობდა. პრემიერ-მინისტრმა აქვე დასძინა, რომ ამ ფაქტის გახსენების გამო იგი თავს უხერხულად გრძნობს.
