საქართველოს ახალგაზრდა იურისტთა ასოციაცია პარლამენტს სასჯელის დანიშვნის წესთან დაკავშირებული კანონპროექტის გადახედვას სთხოვს.
როგორც საია-ს განცხადებაშია ნათქვამი, საქმე ეხება კანონპროექტს, რომლითაც დანაშაულთა ერთობლიობისას სასჯელთა უპირობო შეკრების პრინციპს სასჯელთა სრულად შთანთქმის პრინციპი ანაცვლებს.
კანონპროექტის მიხედვით, „დანაშაულთა ერთობლიობისას საბოლოო სასჯელის დანიშვნისას უფრო მკაცრი სასჯელი შთანთქავს ნაკლებად მკაცრს", ხოლო, დანაშაულის რეციდივის შემთხვევაში, საბოლოო სასჯელის დანიშვნისას შესაძლებელია როგორც შთანთქმის, ისე ნაწილობრივი ან/და მთლიანი შეკრების პრინციპის გამოყენება.
"საია-ს მიაჩნია, რომ კანონპროექტმა მოსამართლის თავისუფლება გაუმართლებლად არ უნდა შეზღუდოს. მოსამართლეს უნდა ჰქონდეს შესაძლებლობა ინდივიდუალური გარემოებები შეაფასოს, ბრალდებულის მახასიათებლები და ყველა სხვა რელევანტური ფაქტორის გათვალისწინებით სასჯელთა სრულად შთანთქმის, ნაწილობრივი შეკრების ან/და სრულად შეკრების წესის გამოყენების შესახებ გადაწყვეტილება მიიღოს " - აცხადებენ ორგანიზაციის წარმომადგენლები.
მათივე განმარტებით, მთავრობის მიერ პარლამენტში ინიცირებული კანონპროექტი არსებით გადამუშავებას საჭიროებს, ამიტომ უმჯობესი იქნება თუ განსახილველი პროექტი იუსტიციის სამინისტროს მიერ მომზადებული კანონპროექტის პირველად ვერსიას დაუახლოვდება, რომელიც სასჯელის დანიშვნის წესს დანაშაულის კატეგორიებს უკავშირებდა.