დღეს, 6 მარტს პარტია „დემოკრატიული მოძრაობის" თავმჯდომარემ ნინო ბურჯანაძემ პარტიული მანდატები გადასცა ახალგაზრდული ფრთის თოთხმეტ ახალ წევრს.
ნინო ბურჯანაძემ კიდევ ერთხელ მადლობა გადაუხადა „დემოკრატიული მოძრაობის" ყველა იმ წევრს, რომლებიც წლების განმავლობაში არ შეუშინდა სასტიკი რეჟიმის წინააღმდეგ ბრძოლას და აღნიშნა:
"ჩვენი ბრძოლა ნამდვილად არ იყო ფუჭი და ამ ახალგაზრდებმა ძალიან კარგად იციან, რომ, რომ არა „დემოკრატიული მოძრაობის" და „სახალხო კრების" ბრძოლა, რომ არა 26 მაისი, დღეს არ იქნებოდა იმის შესაძლებლობა რომ ასე საჯაროდ, შიშის გარეშე წარმოგვედგინა ეს ახალგაზრდები. ხაზგასმით მინდა აღვნიშნო, რომ ამ ახალგაზრდებმა ძალიან კარგად იციან, რომ დღეს ისინი წევრიანდებიან პარტიაში, რომლის მთავარი ამოცანა, მთავარი მიზანი, მთავარი სულისკვეთება ყოველთვის იყო, არის და იქნება ჩვენი სამშობლოს ერთიანობა, ჩვენი სამშობლოს რეალური დამოუკიდებლობა, ჩვენი სამშობლოს რეალური სუვერენიტეტი და ყველა იმ ფასეულობების დაცვა, რასაც ცივილიზებული სამყაროს, დასავლური, დემოკრატიული ფასეულობები ქვია. ამ ადამიანებმა ძალიან კარგად იციან, რომ ჩვენ არასოდეს დავუშვებთ იმას, რომ საქართველოში შეილახოს ადამიანის უფლებები, რომ საქართველოს ინტერესები არ იყოს უმთავრეს პრიორიტეტად წარმოჩენილი და დაცული"- აღნიშნა ბურჯანაძემ.
პარტიაში ახლად გაწევრიანებულმა თამარ ზურაშვილმა ახალგაზრდების სახელით ნინო ბურჯანაძეს დემოკრატიული მოძრაობის ყველა წევრს თანადგომისთვის მადლობა გადაუხადა.
„დემოკრატიულ მოძრაობაში ჩემი გაწევრიანება განაპირობა იმ გარემოებამ, რომ მე და ჩემი ოჯახის წევრები გახლდით წინა ხელისუფლების, მათი რეჟიმის მსხვერპლნი. კერძოდ, მამაჩემი გახლდათ პოლიტპატიმარი და იგი მხოლოდ იმიტომ იქნა უკანანოდ დაკავებული და გასამართლებული, რომ ის იყო ამ პარტიის წევრი და მე ვხედავდი,რომ ეს პარტია მიუხედავად ზეწოლისა და ტერორისა აგრძელებდა უთანასწორო ბრძოლას. არ შეუშინდა და არ გაურიგდა დამნაშავე რეჟიმს. სწორედ ამიტომ ვთვლი, რომ ჩემი ადგილი არის ამ პარტიაში. მაქსიმალურად ვეცდები ჩემი წვლილი შევიტანო პარტიის საქმიანობაში ჩვენივე და საქართველოს უკეთესი მომვალისათვის"- განაცხადა ზურაშვილმა.