საქართველოს საგარეო საქმეთა სამინისტროს დელეგაცია, საგარეო საქმეთა მინისტრის მოადგილის დავით ჯალაღანიას ხელმძღვანელობით ეწვია ლაოსის სახალხო დემოკრატიული რესპუბლიკის დედაქალაქ ვიენტიანს, სადაც მონაწილეობა მიიღო ალმაატის სამოქმედო პროგრამით გათვალისწინებულ საერთაშორისო კონფერენციაში - „Asia-Europe Final Regional Review of the Almaty Program of Action: Addressing the Special Needs of Landlocked Developing Countries within a New Global Framework for Transit Transport Cooperation for Landlocked and Transit Developing Countries".
სამინისტროს ინფორმაციით, საქართველოს დელეგაციის ხელმძღვანელმა მონაწილეობა მიიღო კონფერენციის პლენარული სესიის დროს გამართულ მაღალი დონის დისკუსიაში. დავით ჯალაღანიმ თავის გამოსვლაში ისაუბრა ტრანსპორტის სფეროში თანამშრომლობის გაღრმავების მნიშვნელობის შესახებ ეკონომიკური განვითარების საქმეში, ასევე ტრანზიტის კუთხით სამხრეთ კავკასიის რეგიონში განხორციელებული და დაგეგმილი პროექტების შესახებ და ხაზი გაუსვა საქართველოს, როგორც დიდი სატრანზიტო პოტენციალის მქონე ქვეყნის როლს როგორც რეგიონის, ასევე გლობალური მასშტაბით.
ვიზიტის ფარგლებში გაიმართა საქართველოს დელეგაციის შეხვედრები ლაოსის სახალხო დემოკრატიული რესპუბლიკის ვიცე პრემიერთან, საგარეო საქმეთა მინისტრთან თონგლოუნ სისოულითთან და საგარეო საქმეთა ვიცე-მინისტრთან ალოუნკეო კიტიქოუნთან.
შეხვედრის დროს განხილულ იქნა ორ ქვეყანას შორის არსებული ურთიერთობების განვითარების მნიშვნელობა და ამ მიზნით სამართლებრივი ბაზის ჩამოყალიბების, ორმხრივი ვიზიტების გაცვლისა და ერთობლივი ღონისძიებების ჩატარების აუცილებლობა. საუბარი შეეხო ასევე საქართველოსა და ლაოსს შორის მრავალმხრივ ფორმატებში თანამშრომლობის საკითხებს. საქართველოს დელეგაციამ მიულოცა ლაოსის მხარეს მსოფლიო სავაჭრო ორგანიზაციაში ლაოსის გაწევრიანება, ასევე მადლობა გადაუხადა ლაოსის მთავრობას საქართველოს სუვერენიტეტისა და ტერიტორიული მთლიანობის მხარდაჭერისათვის.
