იუსტიციის მინისტრი თეა წულუკიანი საზოგადოებრივ მაუწყებელში დიპლომებით მივიდა. წულუკიანმა უმაღლესი იურიდიული განათლების დამადასტურებელი ორი დიპლომი გადაცემა "აქცენტების" წამყვანს ეკა კვესტაძეს ჩარჩოში ჩასმული გადასცა .
"მაყურებელს ვცემ პატივს. ორივე დიპლომი საზმაუწყებლისთვის ჩავსვი ჩარჩოში, გავუკეთე ავტოგრაფი და შეინახეთ, თუ გაქვთ ადგილი", - მიმართა წულუკიანმა გადაცემის წამყვანს.
მისივე თქმით, მას 4 დიპლომი აქვს, აქედან ორი საერთაშორისო ურთიერთობებში მის უმაღლეს განათლებას, დანარჩენი ორი კი მის იურისტობას ადასტურებს.
"ENA-ში მივიღე უმაღლესი იურიდიული განათლება და არა მარტო უმაღლესი, უმაღლესის უმაღლესი - საფრანგეთში არსებობს უმაღლეს სასწავლებელზე მაღლა მდგარი რამდენიმე დაწესებულება და ერთ-ერთი ასეთი სკოლაა ENA", - განაცხადა წულუკიანმა და აღნიშნა, რომ მას აქვს 4 დიპლომი, აქედან ორი ემსახურება იმას, რომ გამხდარიყო დიპლომატი.
"1999 წელს მივხვდი, რომ ეს არ მაინტერესებდა და ავიღე ორიენტაცია სამართალმცოდნეობისა და სახელმწიფო მართვის თემისკენ. კონკურსის გზით მოვხვდი ENA-ში. ENA ამზადებს ადმინისტრაციულ მოსამართლეებს. ამ სფეროში, ადმინისტრაციულ სამართალმცოდნეობაში, ევროპულ სამართალში, ადამიანის უფლებებში იძლევა იურიდიულ უმაღლეს განათლებას", - განაცხადა წულუკიანმა.
რაც შეეხება საქართველოს კანონდებმობას, წულუკიანის თქმით, კანონი ითხოვს, რომ იყოს საქართველოს მოქალაქე და ჰქონდეს იურიდიული განათლების უმაღლესი დიპლომი.
"მე მაქვს ორი დიპლომი ENA-დან, ერთი დიპლომი, რომელიც ადასტურებს, რომ მე მაქვს ეს განათლება და მეორე - ესაა ხარისხი, რომელიც არჩევით იყო, მაგრამ მე მოვიპოვე. ასე რომ, ქართული კანონის მოთხოვნას ვაკმაყოფილებ. ჩემი განათლების წარსული არასდროს ყოფილა დამალული და პარლამენტის არც ერთ კომიტეტს ამაზე პრეტენზია არ გამოუთქვამს. პარლამენტმა დამამტკიცა იმ განათლებით, რა განათლებითაც ვარ. მე კანონიერად ვარ იმ თანამდებობაზე, რასაც ჰქვია იუსტიციის მინისტრი და ამიტომ პროკურორი", - განაცხადა თეა წულუკიანმა.