დღეს, 4 მარტს, 15:00 საათზე სახელმწიფო კანცელარიაში საქართველოს პრეზიდენტის მიხეილ სააკაშვილისა და საქართველოს პრემიერ-მინისტრის ბიძინა ივანიშვილის შეხვედრა გაიმართება.
1-ლი ოქტომბრის შემდეგ პრეზიდენტი და პრემიერი მესამედ შეხვდებიან ერთმანეთს. პირველი შეხვედრა საქართველოს პრეზიდენტის რეზიდენციაში 2012 წლის 9 ნოემბერს გაიმართა. მეორედ პრეზიდენტი და პრემიერი ერთმანეთს არაოფიციალურად საქართველოს საპატრიაქოში ილია მეორეს იუბულეს ფარგლებში შეხვდნენ.
პრეზიდენტისა და პრემიერის შეხვედრა ქვეყანაში არსებულ პოლიტიკურ ვითარებას და მოსალოდნელ საკონსტიტუციო ცვლილებებს უკავშირდება.
,,პრეზიდენტი და პრემიერი მიმდინარე პოლიტიკურ ვითარებასა და საკონსტიტუციო ცვლილებებთან დაკავშირებით იმსჯელებენ", -განაცხადა ჟურნალისტებთან პარლამენტის ვიცე-სპიკერმა მანანა კობახიძემ ივანიშვილისა და სააკაშვილის დაგეგმილი შეხვედრის კომენტირებისას.
,, შეხვედრაზე საუბარი იქნება მიმდინარე პოლიტიკურ ვითარებაზე, საკონსტიტუციო ცვლილებებზე, ეს არის ჩვენი ქვეყნის მომავალი, რომელიც უნდა განისაზღვროს ისე, როგორც ამ ქვეყანას, ხალხს სჭირდება. ვფიქრობ, ეს ის თემებია, რომელზეც ბატონი პრეზიდენტი და პრემიერი ისაუბრებენ", -განაცხადა კობახიძემ.