,,შემაშფოთებელია ის ტენდენციები, რომელიც ქვეყანაში დემოგრაფიული კუთხით ვითარდება", - ნათქვამია პრემიერ-მინისტრის განცახდებაში, რომელიც ,,ჯი-ეიჩ-ენს" ,,ქართული ოცნებიდან" მიაწოდეს. როგორც პრემიერი განცხადებაში განმარტავს ხელისუფლება დემოგრაფიული პრობლემების მოსაგვარებლად სპეციალურ კონცეფციას შეიმუშავებს.
"შემაშფოთებელია ის ტენდენციები, რომელიც ვითარდება ჩვენს ქვეყანაში ამ კუთხით. გაერო-ს მონაცემებით, საქართველო დემოგრაფიული კატასტროფის წინაშეა და თუ პრობლემას დროზე არ ვუშველეთ, თუ თანმიდევრულ და ამავე დროს, სასწრაფო ნაბიჯებს არ გადავდგამთ, ეჭვქვეშ დადგება ქართული სახელმწიფოს ფიზიკური გადარჩენა. ამ პრობლემის გადაწყვეტა მთლიანად ჩვენს საზოგადოებასა და სახელმწიფოზეა დამოკიდებული. ჩვენ მივიღეთ გადაწყვეტილება, განვახორციელოთ დემოგრაფიული განვითარების პოლიტიკა. შევიმუშავებთ სპეციალურ კონცეფციას, რომელიც კონცეპტუალურად განსაზღვრავს პრობლემის გადაჭრის გზებს. თუმცა, პრობლემა იმდენად დიდია, რომ ჩვენი საზოგადოების ღრმად გააზრებული და აქტიური მხარდაჭერის გარეშე, საზოგადოებისა და სახელმწიფოს ერთობლივი, დიდი ძალისხმევის გარეშე, ამ პრობლემას ვერ გავუმკლავდებით. კიდევ ერთხელ მადლობას ვუხდი ფონდის დაარსების ინიციატორებს და ყველას, ვინც ამ ფონდში შეტანილი წვლილით უდიდეს სამსახურს გაუწევს ჩვენს ქვეყანას და მომავალს",-ნათქვამია ბიძინა ივანიშვილის განცხადებაში.
შეგახსენებთ, რომ დღეს საქართველოს დემოგრაფიული აღორძინების ფონდი დაფუძნდა, რომელიც სრულიად საქართველოს კათოლიკოს-პატრიარქის, უწმინდესისა და უნეტარესი ილია მეორის ლოცვა-კურთხევის და პრემიერ-მინისტრ ბიძინა ივანიშვილის მხარდაჭერით შეიქმნა.
ფონდის მიზანია, საქართველოში დემოგრაფიული მდგომარეობის გამოსწორება.