ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრი ალექსი პეტრიაშვილი საქართველოს ნატოში ინტეგრაციის საკითხებზე საზოგადოებრივ მრჩეველთა საბჭოს შეხვდა.
სახელმწიფო მინისტრმა საბჭოს წევრებს მიაწოდა ინფორმაცია 2013 წლის წლიური ეროვნული პროგრამის (ANP) მომზადების პროცესისა და ნატოში ინტეგრაციის კუთხით ხელისუფლების მიერ დაგეგმილი ღონისძიებების შესახებ. კერძოდ, 19 თებერვალს ბრუსელში გაიმართა ნატო-საქართველოს კომისიის სხდომა პოლიტიკური კომიტეტის დონეზე, რომელშიც ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრის აპარატის წარმომადგენლებთან ერთად წლიური ეროვნული პროგრამის (ANP) განხორციელებაში ჩართული სახელმწიფო უწყებების წარმომადგენლები მონაწილეობდნენ. ალექსი პეტრიაშვილმა ქართული დელეგაციის ბრიუსელში ვიზიტი წარმატებულად შეაფასა.
სახელმწიფო მინისტრმა წლიური ეროვნული პროგრამის მომზადებისა და განხორციელების თაობაზე მრჩეველთა საბჭოს წევრებისაგან კონკრეტული მოსაზრებები და წინადადებები მოისმინა.
როგორც ალექსი პეტრიაშვილმა აღნიშნა, ჩრდილო-ატლანტიკურ ალიანსში ინტეგრაციის თვალსაზრისით საქართველოს ხელისუფლება ძალიან აქტიურად მუშაობს. „იცით უკვე, რომ ჩრდილოატლანტიკური საბჭოს ვიზიტი არის დაგეგმილი და მნიშვნელოვანია საზოგადოებრივი ჩართულობა, მრჩეველთა საბჭოს აზრი, მათი პოზიცია და მათი თანადგომაც, რომ ეს იყოს ერთობლივი პოზიცია საქართველოს ნატოში ინტეგრაციის კუთხით ნაბიჯების გადადგმის თვალსაზრისით".-განაცხადა ალექსი პეტრიაშვილმა.
საქართველოს ნატოში ინტეგრაციის საკითხებზე სახელმწიფო მინისტრის მრჩეველთა საბჭოსთან შეხვედრები პერიოდულად იმართება. შეხვედრებზე ნატო-საქართველოს ურთიერთობებისა და საზოგადოებისთვის მნიშვნელოვანი სხვა აქტუალური საკითხები განიხილება.