,,პრეზიდენტმა უნდა იცოდეს, რომ მისი დაცვა მისი ნება-სურვილზე დამოკიდებული არ არის", -განაცხადა ჟურნალისტებთან პარლამენტის თავდაცვისა და უშიშროების კომიტეტის თავმჯდომარემ ირაკლი სესიაშვილმა პრეზიდენტის თბილისის საერთაშორისო აეროპორტში დაცვის გარეშე მისვლის კომენტირებისას და აღნიშნა, რომ მიხეილ სააკაშვილის ქმედება საბოტაჟის ნიშნებს შეიცავს.
მისივე განცხადებით, დაცვის სპეციალური სამსახურის ხელმძღვანელობისთვის სააკაშვილის ეს გადაწყვეტილება წინასწარ იყო ცნობილი და მათ, ყველა შესაბამისი ნორმის დაცვით, უსაფრთხოება მთელ პერიმეტრზე უზრუნველყვეს.
"პრეზიდენტმა უნდა იცოდეს, რომ მისი დაცვა მისი ნება-სურვილზე დამოკიდებული არ არის. ეს სახელმწიფოს ვალდებულებაა. მისი მხრიდან და პირადად მისი დაცვის მხრიდან, დაცვის სპეციალაური სამსახურის ხელმძღვანელობისთვის ხელშეშლა საბოტაჟის ნიშნების მატარებელია. მოვუწოდებ პრეზიდენტს, გაამახვილოს ყურადღება იმაზე, რომ მისი ასეთი პიარ-ქმედება შეიძება საფუძველი გახდეს გარკვეული პირების პასუხისგებაში მიცემისა", - განაცხადა ირაკლი სესიაშვილმა და აღნიშნა, რომ დაცვის სპეციალურმა სამსახურმა ამ ფაქტის მოკვლევა დაიწყო და არსებობს ყველა შესაბამისი დოკუმენტაცია, რომელიც ადასტურებს, რომ პრეზიდენტმა და მისი დაცვის სამსახურმა დაცვის სახელმწიფო სამსახური საქმის კურსში არ ჩააყენა.
შეგახსენებთ, რომ მიხეილ სააკაშვილი თბილის საერთაშორისო აეროპორტში ,,ნისანის" მარკის ელექტრომობილით, დაცვის გარეშე მივიდა, რომელსაც თავად მართავდა. მასთან ერთად იმყოფებოდნენ საქართველოს პირველი ლედი სანდრა რულოვსი, თბილისის მერი გიგი უგულავა მეუღლესთან ერთად, ყოფილ პრემიერ-მინისტრი ნიკა გილაური და საპარლამენტო უმცირესობის სხვა ლიდერები.
