,,მიხეილ სააკაშვილმა აბსურდული განცხადებებით დაგვზაფრა და ამაზე ნორმალური ადამიანისთვის კომენტარის გაკეთება რთულია", -განაცხადა ,,ჯი-ეიჩ-ენთან" საუბარში პარლამენტის საგრეო ურთიერთობათა კომიტეტის თავმჯდომარემ თედო ჯაფარიძემ მიხეილ სააკაშვილის განცხადების კომენტირებისას.
,,მიხეილ სააკაშვილის გამოსვლას საქართველოში მიმდინარე პროცესებთან დაკავშირებით, ბანკების შესახებ და ევროპარლამენტის მიერ რეზოლუციის არ მიღებასთან დაკავშირებით ყურადღებით ვუსმენდი. ამის შესახებ, ქართული დელეგაციის ხელმძღვანელმა თინა ხიდაშელმა, კონკრეტული და ზუსტი განცხადება გააკეთა, მაგრამ, სამწუხაროდ, ბატონი პრეზიდენტი ტყუის და იმ საფრთხეებზე, რომელზეც საქართველოს მოსახლეობა წუხს ევროპარლამენტში რეზოლუციის არ მიღებასთან დაკავშირებით რეალური არ არის", -განაცხადა თედო ჯაფარიძემ.
შეგახსენებთ, რომ მიხეილ სააკაშვილის განცხადებით ,,პირველად ისტორიაში მოხდა ისე, რომ ევროკავშირის და საქართველოს, ამ შემთხვევაში ევროპარლამენტისა და საქართველოს ერთობლივი დოკუმენტი ჩავარდა და არ იქნა მიღებული საქართველოს დელეგაციის წინააღმდეგობის გამო.
რამდენიმე წლის წინათ, ჩვენ ასეთ დოკუმენტებზე არც კი ვიოცნებებდით, ჩვენ არც კი ვიყავით ევროკავშირის რადარზე, მაგრამ რვა წლის განმავლობაში მივაღწიეთ იმას, რომ წელს ვილნიუსის სამიტზე, მოლდოვასთან ერთად, საქართველოს შეეძლო მიეღო ევროკავშირის პერსპექტივა. ეს ნიშნავს იმას, რომ ქვეყანა მომავალში განხილული ყოფილიყო ევროკავშირის პოტენციურ წევრად. თუ ეს რაღაც თეორიული შესაძლებლობა იყო, პრაქტიკულად, გადაწყვეტილ საკითხს წარმოადგენდა ასოცირების ხელშეკრულება, თავისუფალი ვაჭრობის ხელშეკრულება, უვიზო მიმოსვლა საქართველოს მცხოვრებთათვის.
მასალის გამოყენების პირობები