პირველად გავიგე, რომ რომელიმე ქვეყანაში პრემიერი წერდეს პრეზიდენტს Facebook-ით და ასევე ითხოვდეს პასუხს, - განაცხადა საქართველოს პრეზიდენტმა მიხეილ სააკაშვილმა ჟურნალისტებთან გამართულ შეხვედრაზე განაცხადა. მისი თქმით, კარგია, რომ ტექნიკური საშუალებები გამოიყენება, თუმცა ეს არ არის პოლიტიკური დიალოგის ფორმა.
"მიმაჩნია, რომ ჩვენ მთავრობასთან უნდა ვსაუბრობდეთ ძალიან ბევრ საკითხზე. თუ ამ სასახლეში არ მოვლენ (და ალბათ, პრობლემები ჰქონდათ შემოსვლასთან დაკავშირებით, რადგან, როგორც იცით, დაცვა შემიმცირეს და დღეს დათო ბაქრაძე 40 წუთი იყო ქვემოთ გაჭედილი), შემიძლია, მე მივიდე პრემიერთან, მას ბევრი დაცვა ჰყავს და ბევრი შესასვლელი აქვს, მისი მომარაგება ბევრად უკეთესია და შემიძლია, სადილზეც ვეწვიო, თუ დამპატიჟებს და ვესაუბრო ამ საკითხებზე. მაგრამ პრემიერ-მინისტრი ამ წერილში წერს: "ხელისუფლების საკითხი ქვეყანაში გადაწყვეტილია" და ა.შ. ხელისუფლების საკითხი მართლაც გადაწყვეტილია, უკვე დიდი ხანია და შემდეგნაირად გადაწყდა: ხელისუფლება ეკუთვნის ქართველ ხალხს, ამიტომაც ნებისმიერი მცდელობა, ხელისუფლება მიითვისოს, კარგის არაფრის მომტანია. მე ვფიქრობ, ეს ბევრმა მთავრობამ ისწავლა, მათ შორის - ჩვენმა მთავრობამაც", - განაცხადა სააკაშვილმა.