ყოფილ აშშ-ის საელჩოს ტერიტორიაზე პრემიერ-მინისტრის ადმინისტრაცია აღარ განთავსდება, _ განაცხადა მთავრობის სხდომის დასრულების შემდეგ კანცელარიის უფროსმა მაია ცქიტიშვილმა
,,ათონელის ქუჩაზე, ყოფილი აშშ-ის საელჩოს ტერიტორიაზე მიმდინარეობდა პრემიერ-მინისტრის ადმინისტრაციის შენობის მშენებლობა. მთავრობის სხდომაზე მიღებული იქნა გადაწყვეტილება ამ შენობასთან დაკავშირებული საკითხების განსაიდუმლოების შესახებ. გადაწყვეტილების მიხედვით, პრემიერის ადმინისტრაცია აღარ გათავსდება ამ შენობაში, შესაბამისად მასზე აღარ ვრცელდება ,,საქართველოს საიდუმლოების შესახებ" კანონით გათვალისწინებული შეზღუდვები", -განაცხადა მაია ცქიტიშვილმა და აღნიშნა, რომ პრემიერ-მინისტრის ადმინისტრაცია კანცელარიაში დარჩება, რადგან საქართველოს ხელისუფლებას არ აქვს ფუფუნება, რომ პრემიერს ცალკე რეზიდენცია ჰქონდეს. როგორც მთავრობის სხდომის დასრულების შემდეგ კანცელარიის უფროსმა განმარტა მთავრობაში მიმდინარეობს მსჯელობა თუ რა ფუნქცია შეიძლება მიენიჭოს აშშ-ის ყოფილ საელჩოს.
მისივე განცხადებით, აშშ-ის ყოფილი საელჩო უნდა ყოფილიყო მხოლოდ პრემიერს რეზიდენციის შესასვლელი და მის უკან უნდა აშენებულიყო ახალი შენობა. კანცელარიის უფროსის განმარტებით ამ ეტაპზე აშენებულია მხოლოდ ორსართულიანი შენობის კარკასი და შესაბამი ორგანოები უკვე სწავლობენ გამოყოფილი თანხების მიზნობრიობას.
,,ჩვენ შევაჩერეთ მშენებლობა და ვსწავლობთ დოკუმანტაციას, ვნახავთ რა ანგარიშსწორება განხორციელდა. მთლიანი პროექტის ღირებულება 26 მილიონ ლარამდე იყო", -განაცხადა მაია და აღნიშნა, რომ ხელშეკრულება 2012 წლის თებერვალში გაფორმდა, რომელიც 21 მილიონამდე ლარის სამუშაოების შესრულებას და რეზიდენციის დასრულებას 2012 წლის სექტემბერში ითვალისწინებდა, ხოლო შემდეგ მშენებლობის დასრულების ვადამ 2013 წლამდე გადაიწია.