"ტყუილია, რომ ევროპული არჩევანი "ნაციონალური მოძრაობის" კუთვნილებაა, რასაც რატომღაც იჩემებენ. ტყუილია, რომ ვინმე აპირებს ამ გზიდან გადახვევას", _ - ამის შესახებ საქართველოს პრემიერ-მინისტრმა ბიძინა ივანიშვილმა ფილარმონიაში პარტია "ქართული ოცნება - დემოკრატიული საქართველოს" რიგგარეშე ყრილობაზე სიტყვით გამოსვლისას განაცხადა.
"ახლა კონსტიტუციაში აპირებენ ამის ჩაწერას, რომ საქართველო კურსს არასოდეს არ შეიცვლის. ღია კარებს ამტვრევენ, ფიქრობენ, რომ ეს მათ მოიგონეს და ეხლა როგორმე უნდათ რომ ჩანაწერი გააკეთონ, რომ ჩვენ ხიფათს არ გადავეყაროთ და "ქართული ოცნება" გზიდან არ აცდეს. მე მგონი ცოტა სასაცილოა. ეს არჩევანი ქართველმა ხალხმა დიდი ხანია გააკეთა. ეს ხალხი ისტორიასაც მიიწერდა, რომელიც თითქოსდა მათი მოსვლით დაიწყო და ეხლა უნდათ მიისაკუთრონ, რომ ევროპული გეზი სააკაშვილმა მოიგონა და ამაში ჩვენს წინაპარს არავითარი დამსახურება არ აქვს. რა თქმა უნდა ანეგდოტური და აბსურდულია", _ განაცხადა ბიძინა ივანიშვილმა და აღნიშნა, რომ სწორედ ამ მიზნისთვისაა საჭირო ევროკავშირსა და ნატოში გაწევრიანება და ამ გზას ხელისუფლება უპირობოდ ადგას და ამ გზაზე ყველაზე მეტად საქართველოს მისი სტრაგეგიული პარტნიორი აშშ ეხმარება.
