დევნილთა მინისტრი დავით დარახველიძე აგრძელებს დიპლომატიური კორპუსის წარმომადგენლებთან შეხვედრას. ოკუპორებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დღეს სამუშაო შეხვედრა ლიტვის რესპუბლიკის საგანგებო და სრულუფლებიანი ელჩთან - იონას პასლაუსკასთან გამართა.
მხარეებმა ძირითადად დევნილთა პრობლემები და საჭიროებები განიხილეს. მინისტრმა დიპლომატს იძულებით გადაადგილებულ პირთა ამჟამინდელი ვითარება გააცნო. წარუდგინა სტატისტიკაც და აღნიშნა, რომ რეგისტრირებული 90 000 დევნილი ოჯახიდან საცხოვრებელი ფართობით დაკმაყოფილებულია მხოლოდ 25 000 ოჯახი, დანარჩენი 65 000 ოჯახი კი ჯერ კიდევ მოლოდინის რეჟიმშია. მინისტრის თქმით, 65 000-დან 40 000-სს საცხოვრებელი ფართის გადაუდებელი საჭიროება გააჩნია.
მინისტრმა ასევე ისაუბრა სამინისტროს 4 წლიან გეგმაზე, რომელიც დევნილი ოჯახების განსახლებას ითვალისწინებს.
ელჩმა მადლობა გადაუხადა მინისტრს მასპინძლობისთვის და აღნიშნა, რომ თანამშრომლობისთვის მზად არის.
როგორც ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა აღნიშნა, შეხვედრა საინტერესო იყო. მინისტრის თქმით, მხარეები შთანხმდნენ, რომ როგორც დევნილი ბავშვებისთვის ისე ზოგადად დევნილი საზოგადოების მხარდასაჭერად გარკვეული რესურსის მოძიება მოხდება.
