საქართველოს საგარეო საქმეთა სამინისტრო იზიარებს საერთაშორისო საზოგადოების შეშფოთებას და მკაცრად გმობს კორეის სახალხო-დემოკრატიული რესპუბლიკის მიერ 2013 წლის 12 თებერვალს ჩატარებულ ბირთვულ ცდას.
სამინისტროს ინფორმაციით, აღნიშნული ფაქტი წარმოადგენს კორეის სახალხო დემოკრატიული რესპუბლიკის მიერ საერთაშორისო ვალდებულებების, მათ შორის, გაერო-ს უშიშროების საბჭოს 1718, 1874 და 2087 რეზოლუციების მთავარი მოთხოვნის - არ აწარმოოს ან გამოსცადოს ბირთვული იარაღი, დარღვევას.
აღნიშნული ბირთვული ცდა წარმოადგენს გამოწვევას ბირთვული იარაღის გაუვრცელებლობის გლობალური რეჟიმის მიმართ და სერიოზულ საფრთხეს უქმნის როგორც საერთაშორისო უსაფრთხოებასა და სტაბილურობას, ასევე მშვიდობას კორეის ნახევარკუნძულზე.
ჩვენ მოვუწოდებთ კორეის სახალხო-დემოკრატიულ რესპუბლიკას ჩაერთოს დიალოგში საერთაშორისო თანამეგობრობასთან და გამოვთქვამთ იმედს, რომ აღნიშნული ქვეყანა მიიღებს შესაბამის ზომებს საერთაშორისო ვალდებულებებისა და გაერო-ს უშიშროების საბჭოს შესაბამისი რეზოლუციების იმპლემენტაციისათვის.
შეგახსენებთ, რომ ჩრდილოეთ კორეამ წარმატებული ბირთვული ცდის ჩატარების შესახებ ინფორმაცია გაავრცელა. ეს ჩრდილოეთ კორეის მიერ თავის ისტორიაში ჩატარებული მესამე ბირთვული ცდაა.
სამშაბათს ჩრდილოეთ კორეაში მიწისქვეშა ბიძგები დაფიქსირდა, რომელთა ეპიცენტრიც ჩრდილო კორეის ბირთვული პოლიგონის ახლოს მდებარეობდა. ინფორმაციას ამის შესახებ "ბი-ბი-სი" ავრცელებს.
მიმდინარე წელს ფხენიანმა არაერთხელ გააკეთა განცხადება იმის შესახებ, რომ ბირთვული ცდის ჩატარებას აპირებდა.
აშშ-ს გეოლოგიურმა სამსახურმა ბიძგების სიმძლავრე 4.9 მაგნიტუდით შეაფასა. გაეროს ბირთვული მონიტორინგის სააგენტომ კი "უჩვეულო სეისმური მოვლენის" შესახებ გააკეთა განცხადება. იმავდრულად, ჩრდილოეთ კორეის სახელმწიფო სააგენტოს მიერ გავრცელებული ინფორმაციით, ცნობილი ამ ბირთვული ცდის ჩატარების შესახებ გახდა. ეს ინფორმაცია ფხენიანმა ამ დილით კიდევ ერთხელ დაადასტურა.
ამ ფაქტთან დაკავშირებით, გაეროს უშიშროების საბჭოს სხდომა საგანგებოდ იკრიბება.
