"ერთი მხრივ, საქართველოს პრემიერ- მინისტრი ბიძინა ივანიშვილი პრეზიდენტ სააკაშვილისა და მისი პარტიის მიმართ ანგარიშსწორებას ახორციელებს, მეორე მხრივ კი უფრთხილდება მეზობელ სახელმწიფოებთან ურთიერთობების დარეგულირებას და თავისი შეხედულებისამებრ მოქმედებს", - წერს თურქული გაზეთი "Zaman"- ი დღევანდელ სტატიაში.
სტატიის მიხედვით - "ამასთან დაკავშირებით, ივანიშვილი ახორციელებს მნიშვნელოვან ოფიციალურ ვიზიტებს. მიმდინარე კვირას ქართველი პრემიერი ანკარაში ჩადის, რამდენიმე ხნის წინ კი იგი ბაქოში იმყოფებოდა, მას მერე კი ერევანში. ივანიშვილის ბაქოში ვიზიტის დროს ქვეყნების ორმხრივი ურთიერთობები ჩვეულ ფორმატში განიხილებოდა, რაც არ იძლევა იმის საშულებას, რომ ახალი საკითხების წინ წამოწევაზე ისაუბრო. ხოლო ერევანში განხორციელებული ვიზიტის დროს კი მრავალი ახალი ისეთი მომენტი გაჩნდა, რომელიც ყურადღების ღირსია", - ნათქვამია სტატიაში და იქვე აღნიშნულია, რომ ყველაზე მნიშვნელოვანი მომენტი ივანიშვილის განცხადებას უკავშირდება, რომელიც საქართველოსა და რუსეთის დამაკავშირებელი სარკინიგზო მიმოსვლის აღდგენას ეხებოდა. აღსანიშნავია, რომ როგორც საქართველოს, ასევე სომხეთს ეს რკინიგზა რუსეთთან აკავშირებს და აფხაზეთზე გადის.
1992 წლის ქართულ-აფხაზური კონფლიქტის შემდეგ ეს მიმოსვლა შეწყვეტილია და სწორედ ამასთან არის დაკავშირებული რუსეთსა და სომხეთს შორის სარკინიგზო მიმოსვლის შეწყვეტა.
მთიანი ყარაბაღის კონფლიქტის შემდეგ სარკინიგზო მიმოსვლა თურქეთთანაც შეწყვეტილია. სხვა სიტყვებით რომ ვთქვათ, უკვე საკმაოდ ხანგრძლივი დროის განმავლობაში სომხეთი გარესამყაროსათვის დახურულია და ამ დანაკლისის შევსებას იგი ბათუმსა და ფოთში არსებული საქართველოს პორტების გამოყენებით ცდილობს.
ივანიშვილის გუნდმა ეს საკითხი გასული წლის ნოემბერში გაახმოვანა პირველად, თუმცა იმის გამო, რომ აფხაზეთის ე.წ. ხელმძღვანელობის ინტერესი არ გამოთქვა, ასევე, აზერბაიჯანის რეაქციის გამო, აღნიშნული საკითხი დაიხურა. თუმცა იგი იმ წამსვე დადგა დღის წესრიგში როგორც კი ივანიშვილმა ამის შესახებ განცხადება გააკეთა. ამავე დროს ივანიშვილის მიერ ამჯერად გაკეთებული განცხადება "გამყარებული" იყო "აფხაზი ლიდერის" ანქვაბის მიერ გაკეთებული განცხადებით იმის შესახებ, რომ კონკრეტული წინადადებების შემთხვევაში ამ საკითხის განხილვა შესაძლებელია. აფხაზი ლიდერის, ეს პოზიტიური განცხადება რუსეთის მიერ არის მხარდაჭერილი და დღეს "ჩვენი აზრით, ძალიან მაღალი ალბათობა იმისა, რომ იგი სწორედ რუსეთის სურვილით განხორციელდეს",- ნათქვამია სტატიაში.
მაგისტრალის აღდგენის შესახებ რუსეთის პოზიციას საფუძვლად საკუთარი ნაციონალური ინტერესები უდევს. ამ რკინიგზის გახსნით, რუსეთი სომხეთში არსებული 102-ე სამხედრო ბაზის უზრუნველყოფას შეძლებს. ეს ბაზა ბოლო დროის განმავლობაში მნიშვნელოვან მატერიალურ -ტექნიკურ სიძნელეებს განიცდის.
"მაგისტრალის აფხაზური მონაკვეთის გახსნით შესაძლებელი იქნება აფხაზეთის პოლიტიკური ლეგიტიმაციის გამყარებაზე საუბარი, რომელიც რუსეთის კონტროლის ქვეშ იმყოფება", _ წერს გაზეთი და აგრძელებს, რომ ასეთი მდგომარეობა პრეზიდენტ მიხეილ სააკაშვილის კრიტიკას იმსახურებს და ქართველი პრემიერის ყურადღებას ამახვილებს იმ ფაქტზე, რომ კრინიგზის ამ მონაკვეთის გახსნა პრობლემურია. სააკაშვილის თქმით, რუსეთი აკონტროლებს სარკინიგზო მონაკვეთებს, როგორც აფხაზეთში, ასევე სომხეთში. ამიტომაც მაგისტრალის გახსნა საქართველოს მხრიდან რკინიგზის ამ მონაკვეთზე ერთგვარად რუსეთის უფლების აღიარების მანიშნებელი იქნება, ხოლო ეს კი თავის მხრივ, ამ ოკუპირებული რეგიონის დაკანონების მაუწყებელი იქნება. სააკაშვილი მიიჩნევს, რომ რკინიგზის საკითხზე საუბარი მხოლოდ და მხოლოდ დეოკუპაციის შემდეგ შეიძლება და ახლა ამ მიმართულებით ნაბიჯების გადადგმა საჭირო არ არის. ასე, რომ სარკინიგზო მაგისტრალის გახსნის შესახებ განცხადებები, რომლებიც ივანიშვილმა გააკეთა საქართველოში, აქტიური დავის საგანი გახდა.
მეორე მხრივ, ამ სარკინოგზო მონაკვეთის გახსნის შესაძლებლობა სომხეთის ხელისუფლებამ დიდი სიხარულით მიიღო. სომხეთის პრემიერი აღნიშნავს, რომ სომხეთი ამ საკითხის ახლო მომავალში გადაჭრას ელოდება და ამისათვის ყველა ღონეს იხმარს.
რა თქმა უნდა, რკინიგზის ამ მონაკვეთის გახსნა ბოლოს მოუღებს სომხეთის იზოლაციას, მაგრამ შსაძლებელია ასევე იმისი მტკიცება, რომ ამ მონაკვეთის ამოქმედებით ამიერკავკასიაში სიტუაცია შეუცვლება. "როდის გაიხსნება გზა - ამის თქმა რთულია, თუმცა ივანიშვილის ხელისუფლებაში ყოფნის დროს ამის ალბათობა მაღალია. ეს საკითხები როგორც თურქეთს ასევე აზერბაიჯანს ეხება და ამ პოზიციებიდან გამომდინარე კავკასიას არ უნდა ვკრათ ხელი", _ ნათქვამია სტატიაში.