საქართველოს პარლამენტის თავმჯდომარე დავით უსუფაშვილი ლატვიის სეიმის დელეგაციას შეხვდა
ლატვიელი პარლამენტარები ადასტურებენ, რომ განვლილი საპარლამენტო არჩევნების შემდეგ, საქართველოს კურსი დასავლეთის, ევროპის, ევროატლანტიკური ორიენტაციის მიმართ კვლავაც უცვლელია, მოვლენები ჩვენს ქვეყანაში ვითარდება ნორმალურად და ლატვიის სეიმი საქართველოსადმი უცვლელ მხარდაჭერას კიდევ ერთხელ ადასტურებს. ამის შესახებ საქართველოში ვიზიტად მყოფმა ლატვიის სეიმის საგარეო საქმეთა კომიტეტის თავმჯდომარემ, ლატვიის სეიმის საქართველოს პარლამენტთან მეგობრობის ჯგუფის წევრმა ოიარს ერიკს კალნინსმა საქართველოს პარლამენტის თავმჯდომარე დავით უსუფაშვილთან თბილისში, იუსტიციის სახლში, გამართული შეხვედრის შემდეგ განაცხადა. მისი თქმით, ლატვიასა და საქართველოს ტრადიციულად ძალიან კარგი ურთიერთობა აქვს და ეს კავშირები მომავალში კიდევ უფრო მჭიდრო გახდება.
ლატვიის სეიმის დელეგაციის წევრებთან გამართული შეხვედრის შემდეგ კომენტარი პარლამენტის თავმჯდომარემ დავით უსუფაშვილმაც გააკეთა. მისი შეფასებით, ეს შეხვედრა ორივე მხარისათვის სასარგებლო და საინტერესო იყო.
„საქართველოსა და ლატვიას შორის ურთიერთობა ეს არის სამაგალითო ურთიერთობა ორ ქვეყანას შორის. ჩვენ შევთანხმდით იმაზე, რომ შეუძლებელია ამ ურთიერთობას რაიმემ ჩრდილი მიაყენოს და ბზარი გაუჩნდეს", - განაცხადა დავით უსუფაშვილმა.
პარლამენტის თავმჯდომარის თქმით, სტუმრები ქვეყანაში მიმდინარე რეფორმებით და აქ არსებული პოლიტიკური ვითარებით დაინტერესდნენ და გამოთქვეს რწმენა, რომ საქართველოსა და ლატვიას შორის თანამშრომლობა კიდევ უფრო გაღრმავდება.
„ლატვიის წვლილი ჩვენი ქვეყნის ევროატლანტიკური ინტეგრაციის მიმართულების კუთხით არის ძალიან დიდი. ისინი გაააგრძელებენ ჩვენს დახმარებას ამ მიმართულებით იმიტომ, რომ გვაქვს საერთო ღირებულებები. მათი დამოკიდებულება ჩვენს ქვეყანაში მიმდინარე პროცესებისადმი არის სრულიად ჯანსაღი, ვინაიდან მიაჩნიათ, რომ ახალმა მთავრობამ, ახალმა ხელისუფლებამ საერთაშორისო ასპარეზზე სწორი კურსი აირჩია", - განაცხადა პარლამენტის თავმჯდომარემ.
საქართველოს პარლამენტის თავმჯდომარესთან შეხვედრაზე სტუმრები ასევე დაინტერესდნენ საკითხით, რომელიც საქართველო-რუსეთის ურთიერთობის შემდგომ განვითარებას ეხებოდა. მხარეები შეთანხმდნენ ორი ქვეყნის პარლამენტებს შორის ურთიერთთანამშრომლობის გაღრმავების აუცილებლობაზე და სამომავლო თანამშრომლობის გზები დასახეს.
