"ქართული ოცნების" ცენტრალური ოფისის წინ კოალიციის რუსთავის ორგანიზაციის ყოფილი ხელმძღვანელი ალექსანდრე ბერიძე შიმშილობას განაგრძობს. ის ადგილზე მთელი ღამის განმავლობაში იმყოფებოდა.
მისი განცხადებით, ის პარტიიდან უსამართლოდ გაათავისუფლეს და დავით საგანელიძის ბრალდება მისი "ნაციონალურ მოძრაობასთან" კავშირის შესახებ უსაფუძვლოა.
საგანელიძის განცხადების შემდეგ, კოალიცია "ქართულ ოცნებაში" დაპირისპირება გრძელდება. უმრავლესობის ლიდერის მიერ ალასანიას პარტიის წევრებისა და პარტიის რეგიონული ორგანიზაციის წარმომადგენლების ჩანერგილებად და "ნაციონალური მოძრაობის" აგენტებად მოხსენიებამ პროტესტი გამოიწვია. საგანელიძის წინააღდეგ რეგიონებში აქციები გაიმართა.
ალასანიას პარტიის წევრი ხონის რაიონული ორგანიზაციიდან ნიკა სანოძე თვლის, რომ უმრავლესობის ლიდერმა ამ განცხადებების გამო პასუხი უნდა აგოს. იმავე პოზიციას იზიარებს "თავისუფალი დემოკრატების" აბაშის რაიონული ორგანიზაციის თავმჯდომარე.
დავით საგანელიძის განცხადებით კი, "ქართული ოცნება" კოალიციაში "ჩანერგილი" პირების სიას სამართალდამცველებს გადასცემს.