ჩახალიანი საქართველოს სახელმწიფოებრიობის შიდა მტერი და უშუალოდ რუსეთის სპეცსამსახურების წარმომადგენელია, - განაცხადა საქართველოს პრეზიდენტმა მიხეილ სააკაშვილმა სომეხი პატიმრის, ვაჰაგნ ჩახალიანის გათავისუფლების შესახებ.
"არ მინდა, ხაზი გავუსვა მის ეთნიკურ წარმომავლობას, რადგან ამას მნიშვნელობა არ აქვს. ჩვენ გვყავს ბევრი ეთნიკურად სომეხი მოქალაქე, რომელიც ბოლო წლებში იარაღით ხელში იცავდა საქართველოს დამოუკიდებლობას, მაგრამ ეს კაცი არის ძალიან კონკრეტული წარმომადგენელი არა სომხეთის, არამედ რუსეთის სპეცსამსახურების _ მისი პირდაპირი რეზიდენტი, წარმომადგენელი საქართველოში. მან დაარბია საქართველოს ეკლესიის ეპარქია ახალქალაქში, მან დაარბია ქართული უნივერსიტეტი ახალქალაქში, დაარბია საქართველოს გამგეობა ახალქალქში და ქართული პოლიცია. ის ეწინააღმდეგებოდა საქართველოს შეიარაღებული ძალების გადაადგილებას ახალქალაქში და რუსეთის ბაზის გასვლას საქართველოს ტერიტორიიდან. ის არის საქართველოს სახელმწიფოებრიობის შიდა მტერი. ჩახალიანის ერთადერთი პარალელი, რაც მახსენდება, არის ვლადისლავ არძინბა. ეს არის ამ მასშტაბის კრიმინალი, დამნაშავე და ეს ჩვენმა სამართალდამცავმა სტრუქტურებმა იცოდნენ - იცოდა პარლამენტმა, იცოდა ჯგუფმა, რომელიც "ამნისტიის შესახებ" კანონზე მუშაობდა, მათ ინფორმაცია ჩვენ მივაწოდეთ. ეს იყო პრემიერ-მინსიტრის გადაწყვეტილება და მომიტევოს ყველამ, მათ შორის მისი პოლიტიკის თაყვანისმცემლებმა, მაგრამ მე გამოვთქვამ ვარაუდს, რომ ეს ნაბიჯი ნაკარნახევი იყო კონკრეტული უცხოური ძალის საამებლად. მას უნდა ახსოვდეს, რომ ისაა საქართველოს პერემიერ-მინისტრი და საქართველოს ინტერესებიდან გამომდინარე უნდა მოქმედებდეს", - აღნიშნა მიხეილ სააკაშვილმა.