ჰააგაში, ნიდერლანდების სამეფოს საგარეო საქმეთა სამინისტროში, საქართველოსა და ნიდერლანდების სამეფოს საგარეო საქმეთა სამინისტროებს შორის გაიმართა ორმხრივი პოლიტიკური კონსულტაციები, დეპარტამენტების დირექტორების დონეზე.
ქართული მხრიდან კონსულტაციებში მონაწილეობდნენ: საგარეო საქმეთა სამინისტროს ევროპულ საქმეთა დეპარტამენტის დირექტორი, ნინო ბარათაშვილი; ევროინტეგრაციის დეპარტამენტის დირექტორი, თეა ახვლედიანი; უსაფრთხოების პოლიტიკისა და ევროატლანტიკური ინტეგრაციის დეპარტამენტის დირექტორი, გიორგი დოლიძე; საერთაშორისო ეკონომიკურ, კულტურულ და ჰუმანიტარულ ურთიერთობათა დეპარტამენტის დირექტორი, თეიმურაზ ჯანჯალია; ნიდერლანდების სამეფოში საქართველოს საგანგებო და სრულუფლებიანი ელჩი, შოთა ღვინერია.
ნიდერლანდური მხრიდან კონსულტაციებში მონაწილეობდნენ: საგარეო საქმეთა სამინისტროს ევროპის დეპარტამენტის დირექტორი, იააპ ვერნერი; ევროინტეგრაციის დეპარტამენტის დირექტორი, ვეპკე კინგმა; სამინისტროს სპეციალური წარმომადგენელი აღმოსავლეთ პარტნიორობის საკითხებში, ელჩი, კლაას ვან დერ ტემპელი; უსაფრთხოების პოლიტიკის დეპარტამენტის დირექტორი, იუპ ვინანდსი; საერთაშორისო ბიზნესის დეპარტამენტის დირექტორის მოადგილე, რია ვესტენდორპი; საქართველოში ნიდერლანდების სამეფოს ელჩი, პიტერ ლანგენბერგი.
შემაჯამებელი შეხვედრა გაიმართა ნიდერლანდების სამეფოს საგარეო საქმეთა სამინისტროს პოლიტიკურ ურთიერთობათა დეპარტამენტის გენერალურ დირექტორთან, კარელ ვან ოოსტერომთან.
ორმხრივი პოლიტიკური კონსულტაციების ფაგრლებში ქართულმა მხარემ შეხვედრა გამართა ნიდერლანდების სამეფოს პარლამენტის საგარეო ურთიერთობათა და თავდაცვის კომიტეტების ხელმძღვანელობასთან. ნიდერლანდური მხარე წარმოდგენილი იყო ქვეყნის კოალიციური მთავრობის მმართველი, სახალხო-ლიბერალური (VVD) და ლეიბორისტული (PvdA), ასევე, საპარლამენტო უმცირესობის, ანტი-ისლამური „თავისუფლებისა" (PVV) და ლიბერალ-დემოკრატთა (D66) პარტიების წევრებით.
კონსულტაციების ფარგლებში გამართულ შეხვედრებზე მხარეებმა განიხილეს საქართველოს ახალი მთავრობის საგარეო პოლიტიკის ძირითადი პრიორიტეტები და ქვეყანაში მიმდინარე პროცესები; საქართველოსა და ნიდერლანდების სამეფოს შორის არსებული ორმხრივი და მრავალმხრივი ურთიერთობების ფართო სპექტრი და თანამშრომლობის გაღრმავების პერსპექტივები; საქართველოს ევროკავშირთან და ნატო-სთან ურთიერთობები, ინტეგრაციის კუთხით ბოლო პერიოდში მიღწეული წარმატებები და სამომავლო გეგმები; თანამშრომლობა საერთაშორისო ორგანიზაციების ფარგლებში; ეკონომიკური დიპლომატიის განვითარების პერსპექტივები; ასევე, რეგიონული და საერთაშორისო მნიშვნელობის საკითხები.
შეხვედრებისას ნიდერლანდურმა მხარემ კიდევ ერთხელ დაადასტურა სრული მხარდაჭერა საქართველოს სუვერენიტეტისა და ტერიტორიული მთლიანობისადმი საერთაშორისოდ აღიარებული საზღვრების ფარგლებში; ასევე, ქვეყნის ევროპულ და ევროატლანტიკურ სტრუქტურებში ინტეგრაციის პროცესისადმი.
ქართულმა მხარემ შეხვედრები გამართა ნიდერლანდური დონორი ორგანიზაციების ("NL Agency International" - ნიდერლანდების სამეფოს ეკონომიკის სამინისტროსთან არსებული სააგენტო, "PUM" - უფროსი ასაკის ექსპერტთა ორგანიზაცია) წარმომადგენლებთანაც, რომლებზეც მხარეებმა განიხილეს საქართველოს საგრანტო კონკურსებში მონაწილეობისა და გრანტების მოპოვების შესაძლებლობები. ორმხრივი პოლიტიკური კონსულტაციების ფარგლებში, ქ. ჰააგაში, „ევროპის სახლში" გაიმართა სემინარი, „საქართველო და ევროკავშირი", რომელშიც მონაწილეობა მიიღეს ქართული დელეგაციის წარმომადგენლებმა. მთავარი მომხსენებლის რანგში წარსდგა საგარეო საქმეთა სამინისტროს ევროინტეგრაციის დეპარტამენტის დირექტორი, თეა ახვლედიანი. სემინარზე განიხილეს საქართველო-ევროკავშირის ურთიერთობები, ინტეგრაციის კუთხით მიღწეული წარმატებები და თანამშრომლობის განვითარების პერსპექტივები. სემინარს ესწრებოდნენ ნიდერლანდების სამეფოში აკრედიტებული დიპლომატიური კორპუსის წარმომადგენლები; ასევე, ნიდერლანდების სამეფოს პარლამენტარები და ევროპარლამენტის ნიდერლანდელი წევრები.
