საქართველოს საგარეო საქმეთა მინისტრმა მაია ფანჯიკიძემ საქართველოს პრემიერის ბიძინა ივანიშვილისა და რუსეთის პრემიერ-მინისტრის დიმიტრი მედვედევის შეხვედრასთან დაკავშირებით განმარტება გააკეთა და აღნიშნა, რომ შეხვედრა შემთხვევით მოხდა.
,,გუშინ საღამოს გაიმართა დავოსის ეკონომიკური ფორუმის დამფუძნებლისა და მასპინძლის ბატონი შვაბის მიღება და სადილი, სადაც მიწვეულები იყვნენ დელეგაციის პირველი პირები. ამ შეხვედრაზე ბრძანდებოდა ბატონი ბიძინა ივანიშვილი და მათ შორის რუსეთის პრემიერ-მინისტრი ბატონი მედვედევი. შეხვედრა დაგეგმილი არანაირად არ ყოფილა, ეს იყო ჩვეულებრივი თავყრილობა, სადაც იყვნენ ქვეყნის პირველი პირები და ამ ფარგლებში მოხდა მათ შეხვედრაც. ისინი ერთმანეთს მიესალმნენ, გაეცნენ ერთმანეთს, მეტი არაფერი არ ყოფილა, მხოლოდ ორი წუთი ისაუბრეს ამაზე მეტი შეხვედრაზე არაფერი ყოფილა", _განაცხადა ფანჯიკიძემ.
რუსეთის პრემიერ-მინისტრი დიმიტრი მედვედევი საქართველოს პრემიერს ბიძინა ივამიშვილს დავოსში გაესაუბრა. რუსული მედია აღნიშნავს, რომ ეს შეხვედრა პირველია ქვეყნის მთავრობის მეთაურებს შორის, რომელიც 2008 წლის აგვისტოს ომის შემდეგ შედგა.
"რუსეთის პრემიერ-მინისტრი დავოსის ეკონომიკური ფორუმის სტუმრების პატივსაცემად გამართულ მიღებაზე საქართველოს პრემიერ მინისტრს ბიძინა ივანიშვილს გაესაუბრა",_ ინფორმაციას ამის შესახებ რუსული მედია ერთ ერთ რუს ბიზნესმენზე დაყრდნობით ავრცელებს, რომელიც ამ შეხვედრას ესწრებოდა.
"საქართველოს პრემიერი თავად მივიდა მედვედევთან და მათ რამდენიმე წუთის განმავლობაშო რაღაცაზე ისაუბრეს", _ წერს რუსული მედია.
რუსეთის მთავრობის მეთაურის პრესსამსახურის ხელმღძვანელის ნატალია ტიმაკოვას ზოგადი ინფორმაციით, ამგვარი დიდი ფორუმების დროს ტრადიციულად ხდება მრავალი კონტაქტი მონაწილეთა შორის.
