უკრაინის პრეზიდენტმა ვოლოდიმირ ზელენსკიმ განაცხადა, რომ რუსეთი უკრაინის წინააღმდეგ ომის შეწყვეტისთვის არ ემზადება და მომავალ წელს მხოლოდ რეაქტიული დრონებისა წარმოებაზე 12 მილიარდი დოლარის დახარჯვას გეგმავს.
ზელენსკის თქმით, რუსეთის პრეზიდენტ ვლადიმირ პუტინს მუდმივად აქვს მიზეზი, რომ არ შეხვდეს მხარეებს, არ გამართოს სამმხრივი მოლაპარაკებები და არ შეაჩეროს ომი.
„აშკარაა, რომ რუსები ომის დასრულებისთვის არ ემზადებიან. ყოველ შემთხვევაში, ამ ეტაპზე. პუტინს მუდმივად აქვს რაღაც მიზეზი, რომ არ შეხვდეს, არ გამართოს სამმხრივი მოლაპარაკებები, არ ისაუბროს და არ დაასრულოს და შეაჩეროს ეს მკვლელობები. წლების განმავლობაში მას ერთი და იგივე [მიზეზი[ აქვს და ამას ყველა ჩვენი პარტნიორი გრძნობს. ის ომის გაგრძელების მიზეზებს ეძებს“, - განაცხადა ზელენსკიმ.
მისივე თქმით, შეერთებული შტატები ვითარებას ანალოგიურად აფასებს და აუცილებელია, რუსეთს ომზე თანხების დახარჯვის ნაცვლად მისი დასრულების სურვილი გაუჩნდეს.
ზელენსკიმ აღნიშნა, რომ უახლოეს დღეებსა და ოქტომბერში დიპლომატიური აქტივობა გააქტიურდება, რათა არსებული ვითარება შეიცვალოს.
„ამასთან ერთად, ლინდსი გრემის კანონი და ზეწოლის სხვა მექანიზმები –-ამ ყველაფერმა კიდევ უფრო აქტიურად უნდა იმუშაოს“, - აღნიშნა უკრაინის პრეზიდენტმა.
ზელენსკის განცხადებით, რუსეთი მომავალ წელს მხოლოდ რეაქტიული დრონებისა საბრძოლო მასალის წარმოებაზე 12 მილიარდი დოლარის დახარჯვას გეგმავს.
„მომავალ წელს მხოლოდ რეაქტიული დრონებისა და საბრძოლო მასალის წარმოებაზე რუსეთი 12 მილიარდი დოლარის დახარჯვას გეგმავს. და ეს მხოლოდ იარაღის ერთი კატეგორიაა. რა თქმა უნდა, ეს მხოლოდ უკრაინას არ ეხება“, - თქვა ზელენსკიმ.
