ოკუპირებული ტერიტორიებიდან იძულებით გადაადგილებიულ პირთა, განსახლებისა და ლტოლვილთა მინისტრი დავით დარახველიძე სტრასბურგში, ევროპის საბჭოს საპარლამენტო ასამბლეის რეზოლუციას წარმატებულ ნაბიჯად აფასებს. მისი თქმით, მნიშვნელოვანია, რომ რეზოლუციაში საუბარია, გავაძლიეროთ დევნილთა უსაფრთხო და ღირსეულ დაბრუნების უფლებაზე.
„ევროპსაბჭოს დოკუმენტში დიდი ყურადღება ენიჭება იძულებით გადაადგილებულ პირთა თემატიკას. საუბარია, რომ რუსულმა მხარემ უპირობოდ უნდა შეასრულოს 2008 წლის 12 აგვისტოს შეთანხმებით აღებული ცეცხლის შეწყვეტის შესახებ 6-პუნქტიანი შეთანხმება. მსგავსი ჩანაწერი ევროპის საბჭოს სხვა ჰუმანიტარული სახის რეზოლუციაში არ ყოფილა აქამდე დაფიქსირებული. მინდა, დევნილ მოსახლეობას მივულოცო აღნიშნული წინგადადგმული ნაბიჯი და მინდა გავამხნევო, რომ მათ უფლებების დასაცავად როგორც საქართველოს ხელისუფლება, ისე საერთაშორისო საზოგადოება ყველაფერს გააკეთებს" - აცხადებს დავით დარახველიძე.
მინისტრის თქმით, ასევე მნიშვნელოვანია, რომ უზრუნველყოფილი იყოს ადმინისტრაციულ საზღვარზე გადაადგილების თავისუფლება; დაიცვან გალისა და ახალგორის რაიონებში მცხოვრებთა უფლება მიიღონ განათლება მშობლიურ ენაზე და უზრუნველყონ ევროკავშირის მონიტორინგის მისიის (EUMM) საქმიანობა ოკუპირებულ ტერიტორიებზე.
დავით დარახველიძის თქმით, მნიშვნელოვანი და პოზიტიური ნაბიჯია, როცა ასამბლეის წევრთა აბსოლუტურმა უმრავლესობამ საქართველოს სახელმწიფოს, ტერიტორიულ მთლიანობასა და დევნილთა ჰუნამიტარული უფლებების უზრუნველყოფას მხარი დაუჭირა.
მინისტრის თქმით: „ჩვენ ყველაფერს გავაკეთებთ, დევნილთა საცხოვრებელი პირობების შექმნის და არსებულის გაუმჯობესებისათვის. მაგრამ, დევნილთა პრობლემები მოგვარებული იქნება მხოლოდ მაშინ, როცა ჩვენ დავბრუნდებით ჩვენ მამაპაპისეულ მიწა-წყალზე და სახლ-კარში."