ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა ალექსი პეტრიაშვილმა ლატვიის რესპუბლიკაში სამუშაო ვიზიტის ფარგლებში მორიგი შეხვედრა თავდაცვის მინისტრ არტის პაბრიკსთან გამართა.
ლატვიის თავდაცვის მინისტრთან შეხვედრაზე საუბარი შეეხო საქართველო-ლატვიას შორის თავდაცვისა და უსაფრთხოების სფეროში ორმხრივი თანამშრომლობის საკითხებს. სახელმწიფო მინისტრმა კიდევ ერთხელ აღნიშნა საქართველოს ტერიტორიული მთლიანობისა და სუვერენიტეტისადმი, ასევე, საქართველოს ოკუპირებულ ტერიტორიებზე ევროკავშირის სადამკვირვებლო მისიის მანდატის გაგრძელებაში ლატვიის მხარდაჭერის მნიშვნელობა.
ლატვიის მხარესთან შეხვედრებზე სახელმწიფო მინისტრმა საქართველოს მთავრობის ერთ-ერთ მთავარ პრიორიტეტზე - საქართველოს ტერიტორიების დეოკუპაციის საკითხზე გაამახვილა ყურადღება და აღნიშნა, რომ საქართველოს ხელისუფლება შეეცდება საერთაშორისო საზოგადოების კონსოლიდაციის უზრუნველყოფას საერთაშორისოდ აღიარებულ საზღვრებში საქართველოს ტერიტორიული მთლიანობისა და სუვერენიტეტის მხარდასაჭერად. სახელმწიფო მინისტრმა, ასევე, ხაზი გაუსვა ჟენევის მოლაპარაკებების, როგორც მხარეებს შორის კონფლიქტის დარეგულირების ეფექტურ მექანიზმს.
სახელმწიფო მინისტრმა განსაკუთრებით აღნიშნა საქართველოს ევროატლანტიკურ სტრუქტურებში ინტეგრაციისა და ავღანეთში ISAF-ის საერთაშორისო მისიის ფარგლებში საქართველოსა და ლატვიის მიერ შეტანილი წვლილის მნიშვნელობა.
ვიზიტის ფარგლებში ალექსი პეტრიაშვილმა მონაწილეობა მიიღო ლატვიაში საქართველოს საელჩოსა და ლატვიის საერთაშორისო საქმეთა ინსტიტუტის მიერ ორგანიზებულ დისკუსიაში, რომელსაც ლატვიის არასამთავრობო ორგანიზაციების წარმომადგენლებს ესწრებოდნენ.
