ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ალექსი პეტრიაშვილი სამუშაო ვიზიტით ლატვიის რესპუბლიკაში იმყოფება, სადაც ორმხრივი შეხვედრები გამართა საგარეო საქმეთა მინისტრ ედგარს რინკევიჩთან და ლატვიის პარლამენტის საგარეო ურთიერთობათა კომიტეტის თავმჯდომარე ოიარს ერიკს კალნინთან.
შეხვედრებზე მხარეებმა განიხილეს საქართველო-ლატვიას შორის ორმხრივი ურთიერთობების გაღრმავების საკითხები სხვადასხვა მიმართულებით. ალექსი პეტრიაშვილმა ხაზგასმით აღნიშნა, რომ საქართველოს საგარეო-პოლიტიკური კურსი უცვლელია და ევრო-ატლანტიკური ინტეგრაცია საქართველოს მთავრობის პრიორიტეტს წარმოადგენს. სახელმწიფო მინისტრმა მადლიერება გამოხატა მეგობარი ქვეყნის - ლატვიის აქტიური მხარდაჭერისათვის საქართველოს ევროპულ და ევროატლანტიკურ სტრუქტურებში ინტეგრაციის გზაზე და ხაზი გაუსვა ამ პროცესში ლატვიის გამოცდილების გაზიარების მნიშვნელობას. შეხვედრებზე, ასევე, ვრცლად ისაუბრა "აღმოსავლეთ პარტნიორობის" ფორმატში საქართველო-ევროკავშირის ურთიერთობებზე. სახელმწიფო მინისტრმა მადლობა გადაუხადა ლატვიის მხარეს უცვლელი პოზიციისათვის საქართველოს სუვერენიტეტისა და ტერიტორიული მთლიანობის მხარდაჭერისა და საქართველოს ოკუპირებული რეგიონების არაღიარების პოლიტიკის მტკიცედ გატარებასთან დაკავშირებით. ალექსი პეტრიაშვილმა განსაკუთრებულად აღნიშნა ლატვიის მიერ ნეიტრალური სამგზავრო დოკუმენტის აღიარებისა და ასევე, საქართველოს ოკუპირებულ ტერიტორიებზე ევროკავშირის სადამკვირვებლო მისიის მანდატის გაგრძელებაში მხარდაჭერის მნიშვნელობა.
შეხვედრების დროს სახელმწიფო მინისტრმა ისაუბრა საქართველოს პრემიერ-მინისტრის მიერ რუსეთთან ურთიერთობის საკითხებში სპეციალური წარმომადგენლის ზურაბ აბაშიძის დანიშვნისა და ჟენევის ფორმატის, როგორც რუსეთთან კონფლიქტის მოგვარების მთავარი ინსტრუმენტის მნიშვნელობაზე.
დღესვე, ალექსი პეტრიაშვილმა შეხვედრა გამართა ლატვიის პარლამენტის საქართველოსთან ურთიერთობების საპარლამენტო ჯგუფის წევრებთან.
სახელმწიფო მინისტრმა მადლიერება გამოხატა 2011 წლის 15 ივნისს ლატვიის პარლამენტის მიერ მიღებულ გადაწყვეტილებასთან დაკავშირებით, სადაც რუსეთის მიერ საქართველოს ოკუპაციაა დაგმობილი.