პარტია „ერთიანი ნაციონალური მოძრაობა" საგადასახადო ამნისტიის მხარდასაჭერად ხელმოწერების შეგროვებას იწყებს. ამის შესახებ პარტის გენერალურმა მდივანმა ვანო მერაბიშვილმა ტელეკომპანია „რუსთავი 2"-ის ეთერში გადაცემა „პოზიციაში" განაცხადა.
მისი თქმით, საქართველოს ეკონომიკაში საგანგაშო მდგომარეობაა და რის გამოც "ნაციონალური მოძრაობა" ხელისუფლებაში ყოფნის შემთხვევაში საგანგებო რეჟიმზე გადაერთვებოდა.
ამასთან, ყოფილი პრემიერის თქმით, შექმინილი სიტუაციიდან გამოსვლის მიზნით "ნაციონალური მოძრაობა" დღეიდან საქართველოში აქტიურ კამპანიას და ხელმოწერების შეგროვებას დაიწყებს, რათა პარლამენტმა საგადასახადო ამნისტიასა და ფინანსური დანაშაულის დეკრიმინალიზაციასთან დაკავშირებით პრეზიდენტის საკანონმდებლო ინიციატივები მიიღოს.
მისი თქმით, ეკონომიკური ამნისტია ვარდების რევოლუციის შემდეგ მოსულმა მთავრობამაც გამოაცხადა 2004 წელს, რამაც დადებითი შედეგი გამოიღო, ამიტომ მერაბიშვილი ახლაც მომხრეა, რომ მთავრობამ იგივე ნაბიჯი გადადგას.
"იანვარში ისეთივე არასახარბიელო მდგომარეობაა ეკონომიკაში, როგორც იყო ბოლო სამი თვის განმავლობაში. ახალი მთავრობის მოსვლის შემდეგ მკვეთრად გაუარესდა ყველა მაჩვენებელი _ ეკონომიკურ ზრდასთან, ეკონომიკურ აქტივობასთან, ექსპორტ-იმპორტთან, დეპოზიტებსა და კრედიტებთან დაკავშირებით. შეგვიძლია ცალსახად ვთქვათ, რომ ბოლო სამი თვე გვაძლევს განგაშის საფუძველს და ვთვლი, რომ მთავრობის ვალია საგანგებო ზომები მიიღოს. მსგავსი მონაცემები რომ ყოფილიყო ჩვენი მთავრობის დროს, ჩვენ საგანგებო რეჟიმზე გადავიდოდით. მთავრობის ყველა წევრი, რეგიონული ხელმძღვანელები, მთელი სახელმწიფო აპარატი დაიწყებდა ბიზნესთან მოლაპარაკებას და შესთავაზებდა კონკრეტულ გეგმებს კრიზისიდან გამოსასვლელად", - განაცხადა მერაბიშვილმა.