"რიტორიკა, რომელსაც პრეზიდენტი ბოლო დღეების განმავლობაში ქვეყნის მიმართ აფიქსირებს შემიძლია ვთქვა, რომ ეს არის საკუთარი სახელმწიფოსა და ხალხის ღალატი", -განაცხადა ,,ჯი-ეიჩ-ენთან" საუბარში ექსპერტმა პოლიტიკის საკითხებში ხათუნა ლაგაზიძემ პრეზიდენტის სტრასბურგში გამოსვლის კომენტირებისას და აღნიშნა, რომ სააკაშვილი ცდილობს ქვეყანა საერთაშორისო იზოლაციაში მოაქციოს.
,,ბუნებრივია, როცა ოპოზიციური პარტიები მმართველი პარტიის კურსს აკრიტიკებენ, მაგრამ როცა ქვეყნის პრეზიდენტი ყველაფერს აკეთებს იმისთვის, რომ ქვეყანა საერთაშორისო იზოლაციაში მოაქციოს ამ მოქმედებას ღალატის გარდა სხვა კვალიფიკაცია არ აქვს. სააკაშვილის დღევანდელი ხელისუფლების მიმართ რა პირადი შური და ბოღმაც უნდა ჰქონდეს უფლება არ აქვს მის პირად შურსა და ბოღმას ქვეყნის ინტერესები გადააყოლოს. შეიძლება პრეზიდენტს არ მოსწონდეს ხელისუფლების გარკვეული მიმართულებები, მაგრამ ამ საკითხებთან დაკავშირებით კონსულტაციები იმ რეჟიმში უნდა ხდებოდეს, რომ ქვეყანა მიზანმიმართულად საერთაშორისო იზოლაციაში არ მოაქციოს", -განაცხადა სააგენტო ,,ჯი-ეიჩ-ენთან" საუბარში ლაგაზიძემ და აღნიშნა, რომ პრეზიდენტის გამოსვლა გარკვეულწილად დააზარალებს საქართველოს იმიჯს საერთაშორისო ასპარეზზე.
"პრეზიდენტის გამოსვლა გარკვეულწილად დააზარალებს საქართველოს იმიჯს, მაგრამ გახსოვთ ნოემბრის თვეში როგორი შემოტევა იყო საერთაშორისო მედიის მხრიდან როცა ყოფილი ხელისუფლების წარმომადგენლების დაკავებები დაიწყო. შემდეგ საერთაშორისო მედიის აგრესია მინელდა, რადგან საქართველოში მიმდინარე პროცესებთან დაკავშირებით რეალური პოზიცია მიეწოდა შესაბამის სტრუქტურებს. ვფიქრობ, ახლაც იგივე რეალობის წინაშე დავდგებით, პრეზიდენტის სტრასბურგში გამოსვლას რეზონანსი ექნება, მაგრამ ბევრია დამოკიდებული იმაზე ახალი ხელისუფლება როგორ საინფორმაციო პოლიტიკას აწარმოებს, არა ლობისტების, არამედ ოფიციალური წყაროების საშუალებით და ადეკვატურად უნდა შეფასდეს სააკაშვილის მოქმედებები", -განაცხადა ლაგაზიძემ და აღნიშნა, რომ ხელისუფლებამ ქყეყნის საგარეო პოლიტიკურ საკითხებთან დაკავშირებით მეტი პასუხისმგებლობა უნდა გამოიჩინოს.
შეგახსენებთ, რომ პრეზიდენტი სტრასბურში ევროსაბჭოს საპარლამენტო სესიაზე სიტყვით გამოვიდა და ქვეყანაში მიმდინარე პროცესებთან დაკავშირებით ისაუბრა.
