თქვენ იცით, რომ ჩვენ ახლა გვაქვს თურქეთთან სერიოზულად გართულებული ურთიერთობა, - განაცხადა საქართველოს პრეზიდენტმა მიხეილ სააკაშვილმა მის ადმინისტრაციაში ჟურნალისტებთან გამართული შეხვედრისას. როგორც მიხეილ სააკაშვილმა აღნიშნა, ეს ჩანს ბევრ რაღაცაში.
"ბევრი თურქული ინვესტიცია საქართველოში შეჩერდა. მინდა გითხრათ, რომ თურქეთი არის ჩვენი მთავარი მხარდამჭერი ნატო-ში ინტეგრაციის საკითხში, იმიტომ რომ თურქეთი მხარდაჭერის გარეშე ნატო-ში ინტეგრაცია არის წარმოუდგენელი. ეს მხარდაჭერა ბოლო ორი -სამი წელია გავააქტიურეთ. ნატო-ს გეგმით არის ის, რომ პირველი მხარდამჭერი უნდა გყავდეს ძლიერი მეზობელი დაცვის ხაზი, სანამ არ ამოქმედდება უკვე ამერიკული ქოლგა. თურქეთმა ბოლო რამდენიმე წელი გამოთქვა ამის სურვილი, რაც ადრე არ ყოფილა. მათთან რაიმე სახის პრობლემების შექმნით ჩვენ ვკარგავთ ნატო-ში შესვლის ამ ისტორიულ შანსს", -განმარტა მიხეილ სააკაშვილმა.
მიხეილ სააკაშვილი ამით გამოეხმაურა სომხეთში პრემიერ-მინისტრის ბიძინა ივანიშვილის მიერ გაკეთებულ განცხადებას, რომლის თანახმადაც იგი მხარს უჭერს აფხაზეთის გავლით სომხეთსა და რუსეთს შორის სარკინიგზო მაგისტრალის აღდგენას. მიხეილ სააკაშვილის განმარტებით, სომხეთის იზოლაცია საქართველოს ხელისუფლებას არასოდეს უცდია, მაგრამ ერთია სომხეთთან კარგი ურთიერთობა და მეორეა ოკუპანტის სტრატეგიული გეგმების შესრულება.
