„საერთაშორისო გამჭვირვალობა - საქართველოს" ინფორმაციით, ხელისუფლების ცვლილება ადგილობრივი თვითმმართველობების დონეზეც მასობრივად მიმდინარეობს
„საერთაშორისო გამჭვირვალობა - საქართველოს" ინფორმაციით, ხელისუფლების ცვლილება ადგილობრივი თვითმმართველობების დონეზეც მასობრივად მოხდა და ახლაც მიმდინარეობს. როგორც ორგანიზაციის მიერ გავრცელებულ განცხადებაშია აღნიშნული რეგიონებში სამსახურიდან დათხოვნები ძირითადად ხასიათდება იმით, რომ არ იქმნება საატესტაციიო კომისიები ან ასეთის არსებობის შემთხვევაში არ არის უზრუნველყოფილი მათი მიუკერძოებლობა; ზეპირი ატესტაციის დროს ისმება შეკითხვები, რომლებიც საჯარო მოხელის შვებულების დროს პოლიტიკურ აქტივობას უკავშირდება, რეგიონებში საჯარო სამსახურში ახალი თანამშრომლების მიღების დროს ხშირად იკვეთება ნეპოტიზმი, ანუ კადრების შერჩევა არა კვალიფიკაციის, არამედ - ნათესავური კავშირების ნიშნით.
„საერთაშორისო გამჭვირვალობა - საქართველოს" ინფორმაციით, აჭარის მთავრობის აპარატში 11 ადამიანი გათავისუფლდა თანამდებობიდან საკუთარი განცხადებით, მათ შორის მხოლოდ 2 სხვა თანამდებობაზე გადასვლის მიზნით, ერთი კი ბრძანების საფუძველზე გაათავისუფლეს სამსახურში ზედიზედ რამდენჯერმე გამოუცხადებლობის გამო.
ორგანიზაციის ინფორმაციით, ზუგდიდის მუნიციპალიტეტის საკრებულოს ამ დრომდე არ ჩამოუყალიბებია საკონკურსო-საატესტატო კომისია, რომელმაც უნდა შეარჩიოს გამგებლის კანდიდატები და წარადგინოს სხდომაზე. კომისიის შექმნას კანონმდებლობა ითვალისწინებს, თუმცა საკრებულო არ ჩქარობს. ჩვენ ვერ მიიღო პასუხი კითხვაზე, თუ როდის დასრულდება პროცესი. შესაბამისად, კოალიცია „ქართული ოცნების" ზუგდიდის ორგანიზაციის ხელმძღვანელი ედიშერ თოლორაია ამ დრომდე აგრძელებს გამგებლის მოვალეობის შესრულებას - ის ამ საქმიანობას 2012 წლის 24 დეკემბრიდან, მას შემდეგ შეუდგა, რაც 18 დეკემბერს თანამდებობა დატოვა ყოფილმა გამგებელმა ალექსანდრე ქობალიამ. ორდღიანი მოლაპარაკების შემდეგ 14 იანვარს ჩვენი კოორდინატორები შეხვდნენ ედიშერ თოლორაიას. გამგებლის მოვალეობის შემსრულებელმა თქვა, რომ არ აპირებს სამსახურიდან გაათავისუფლოს ის ადამიანები, ვინც მუნიციპალიტეტის გამგეობის სხვადასხვა თანამდებობაზე წლების განმავლობაში მუშაობდნენ - მიზეზად თოლორაია მათ კვალიფიკაციას, გამოცდილებას და ამასთან, ადამიანურ ფაქტორს ასახელებს.მიუხედავად ამ დაპირებებისა, „საერთაშორისო გამჭვირვალობა - საქართველომ" გაარკვია, რომ გასულ კვირას თოლორაიამ საგანგებო თათბირი მოიწვია, რომელსაც ესწრებოდნენ აპარატის თანამშრომლები და გამგეობის სამსახურების ხელმძღვანელები. გამგებლის მოვალეობის შემსრულებელმა ყველა მათგანს სამსახურიდან წასვლის შესახებ განცხადების დაწერა მოსთხოვა, ასევე, მოუწოდათ, მათდამი დაქვემდებარებული პირები დაერწმუნებინათ იგივეში.
ზუგდიდის მსგავსად, საკონკურსო-საატესტატო კომისია არც ხობში ჩამოყალიბებულა, თუმცა იქ საჯარო მოსამსახურეთა გათავისუფლების პროცესი აქტიურად მიმდინარეობს - 5 იანვარს ხობის მუნიციპალიტეტის გამგეობის 9 სამსახურის უფროსმა და 22 ტერიტორიული ორგანოს რწმუნებულმა პირადი განცხადების საფუძველზე თანამდებობა დატოვა. ასევე პირადი განცხადების საფუძველზე სამსახურიდან წავიდნენ საკრებულოს აპარატის 8 თანამშრომელი.
ორგანიზაციის ინფორმაციით, ცვლილება შეეხო წალენჯიხის მუნიციპალიტეტსაც - საკონკურსო-საატესტაციო კომისიამ გამგებლის თანამდებობის ვაკანსიაზე კანდიდატად „ქართული ოცნების" მხარდამჭერი გოგა გულორდავა დაასახელა. პირველი ეტაპის შემდეგ კომისიამ სულ 14 კანდიდატურა დაასახელა. გულორდავა 2007 წელს სამსახურეობრივი უფლებამოსილების გადამეტების ბრალდებით დააკავეს და რამდენიმე თვეში გაათავისუფლეს. როგორც საჯარო განცხადებიდან ჩანს, გულორდავა მისი საქმის გადახედვას მოითხოვს, მას ამჟამად ნასამართლეობა მოხსნილი აქვს.
როგორც ,,საერთაშორისო გამჭვირვალობა - საქართველოს" მიერ გავრცელებულ განცხადებაშია აღნიშნული, აბაშაში საკონკურსო-საატესტატო კომისია ყველაზე ადრე ჩამოაყალიბეს და გამგებლის კანდიდატურაც დაასახელეს, თუმცა მუნიციპალიტეტში საპროტესტო აქციები სწორედ ამ კანდიტატურის დასახელებას მოყვა. გოჩა ჭანტურიას უნდობლობას უცხადებენ კოალიცია „ქართული ოცნების" წევრები, რომელთა ნაწილმაც საპროტესო აქციების შემდეგ შიმშილობა დაიწყეს. თავად ჭანტურია უარყოფს ბრალდებას, რომ „ნაციონალური მოძრაობის" მხარდაჭერით მოხვდა ახალ თანამდებობაზე, მოწინააღმდეგე პოლიტიკური ბანაკის წარმომადგენლები კი მას ყოფილი ხელისუფლების მიმართ პოლიტიკური სიმპატიის გარდა, არაკომპეტენტურობაშიც ადანაშაულებენ და აცხადებენ, რომ მას საჯარო მოხელისთვის აუცილებელი არც განათლება აქვს და არც გამოცდილება. გოჩა ჭანტურიასთან ერთად მოშიმშილეები საკრებულოს თავმჯდომარის დავით თოფურიას უპირობოდ გადადგომასაც ითხოვენ. კოალიციის მხარდამჭერებს გამგებლის თანამდებობაზე საკუთარი კანდიდატურა ჰყავთ - ირაკლი რუხაძე, რომელიც საბჭოთა კავშირის დროს აბაშაში სხვადასხვა ადმინისტრაციულ თანამდებობაზე მუშაობდა.
