გაფართოვდება. ადამიანის უფლებათა დაცვისა და სამოქალაქო ინტეგრაციის კომიტეტმა პირველი მოსმენისთვის განიხილა საქართველოს მთავრობის საკანონმდებლო ინიციატივა, რომელიც ,,სისხლის სამართლის საპროცესო კოდექსში" ცვლილებების შეტანას ითვალისწინებს. კერძოდ, 2013 წლის 1 იანვრიდან 2014 წლის 1 ოქტომბრამდე, თბილისისა და ქუთაისის საქალაქო სასამართლოები ნაფიც მსაჯულთა მონაწილეობით განიხილავენ მათი ტერიტორიული განსჯადობისთვის მიკუთვნებულ ისეთ შემთხვევებსაც, როდესაც სისხლის სამართლის საქმეები ეხება: "საჯარო სამსახურში ინტერესთა შეუთავსებლობისა და კორუფციის შესახებ" კანონის მე-2 მუხლში მითითებულ თანამდებობის პირებს, რომლებსაც ეკავათ ან უკავიათ შესაბამისი თანამდებობა და იმ პირებს, რომლებიც ბრალდებულნი არიან ზემოაღნიშნულ პირებთან ერთობლივი დანაშაულის ჩადენაში. იუსტიციის მინისტრის მოადგილის, ალექსანდრე ბარამიძის განცხადებით, იმ კითხვებსა და ეჭვებს, რომელიც წინა ხელისუფლების დაპატიმრებულ მაღალჩინოსანთა საქმეებთან დაკავშირებით გამოითქმის, ნაფიც მსაჯულთა სასამართლოს პირობებში ყველაზე ობიექტური და სამართლიანი პასუხი გაეცემა.
,,ერთიანი ნაციონალური მოძრაობის" წევრების განცხადებით, ისინი ნაფიც მსაჯულთა განსჯადობის სფეროს გაფართოების წინააღმდეგი არ არიან, თუმცა იმის გამო, რომ მათი დაპატიმრებული თანაგუნდელების წინააღმდეგ საზოგადოებრივი აზრის ფორმირება და ამ ადამიანების ,,დემონიზაცია" ხდება, ნაფიცი მსაჯულების მიერ ობიექტური გადაწყვეტილების მიღება ეჭვქვეშ დგება. საპარლამენტო უმცირესობამ სხდომაზე ალტერნატიული პროექტი წარმოადგინა, რომელიც ნაფიც მსაჯულთა სასამართლოების მიერ განსახილველი საქმეების არეალში სისხლის სამართლის კოდექსის იმ მუხლების მოხვედრასაც ითვალისწინებს, რომელიც განზრახ მკვლელობას, დანაშაულს სქესობრივი თავისუფლებისა და ხელშეუხებლობის წინააღმდეგ, ყაჩაღობას, ძარცვას და ოჯახურ ძალადობას შეეხება. პროექტი ითვალისწინებდა ტერიტორიული განსჯადობის გაზრდასაც, კერძოდ თბილისისა და ქუთაისის გარდა ნაფიც მსაჯულთა მონაწილეობით სასამართლოების ბათუმში გამართვას, აგრეთვე პროცესების საჯაროობას და მოწმეების მოსამართლეების თანდასწრებით დაკითხვას.
ადამიანის უფლებათა დაცვისა და სამოქალაქო ინტეგრაციის კომიტეტი და იუსტიციის მინისტრის მოადგილე ალექსანდრე ბარამიძე უმცირესობის მიერ შემოთავაზებული პროექტიდან ნაფიც მსაჯულთა მონაწილეობით სასამართლო პროცესების საჯაროობის საკითხს დაეთანხმა. კომიტეტი ასევე რეკომენდაციით გამოვიდა, რომ მოწმეების მოსამართლეების თანდასწრებით დაკითხვის ნორმის ამოქმედების ვადამ სამი თვით გადმოიწიოს. აღნიშნული ცვლილებების გათვალისწინებით ადამიანის უფლებათა დაცვისა და სამოქალაქო ინტეგრაციის კომიტეტმა ხმათა უმრავლესობით მხარი დაუჭირა პროექტის პლენარულ სხდომაზე გატანას.
ადამიანის უფლებათა დაცვისა და სამოქალაქო ინტეგრაციის კომიტეტმა სხდომაზე პირველი მოსმენისთვის განიხილა პარლამენტის წევრის, კობა დავითაშვილის მიერ საკანონმდებლო ინიციატივის წესით წარმოდგენილი კანონპროექტი „პროკურატურის შესახებ" საქართველოს კანონში ცვლილების შეტანის თაობაზე" და მისგან გამომდინარე კანონპროექტები. პროექტის თანახმად, მოხდება საქართველოს იუსტიციის მინისტრისა და მთავარი პროკურორის უფლებამოსილებების გამიჯვნა. მნიშვნელოვანი სიახლეა ისიც, რომ კანონპროექტით მთავარ პროკურატურას უხელმძღვანელებს მთავარი პროკურორი, რომელსაც იუსტიციის მინისტრის წარდგინებით და საქართველოს მთავრობის თანხმობით თანმდებობაზე დანიშნავს და თანამდებობიდან გაათავისუფლებს საქართველოს პრემიერ-მინისტრი. კანონპროექტის ავტორის განმარტებით, აღნიშნული ცვლილებები განაპირობებს პროკურატურის პოლიტიკურ ნეიტრალიტეტს და მის ინსტიტუციურ დამოუკიდებლობას სისხლის სამართლებრივი დევნის ფუნქციის განხორცილების სფეროში.
ადამიანის უფლებათა დაცვისა და სამოქალაქო ინტეგრაციის კომიტეტმა მხარი დაუჭირა პროექტის პლენარულ სხდომაზე გატანას.
მასალის გამოყენების პირობები