ამერიკელი ვარსკვლავები, ინტერნეტ-მომხმარებლებმა ფარისევლობაში დაადანაშაულეს. საქმე ეხება ვიდეორგოლს, სადაც ვარსკვლავები ცეცხლსასროლ იარაღზე კონტროლის გამკაცრებას ითხოვენ. ვიდეორგოლი „იუთუბზე" დეკემბრის ბოლოს გამოჩნდა, თუმცა, მას ყურადღება მხოლოდ იანვრის დასაწყისში მიაქციეს.
კამპანია, სახელწოდებით „Demand a Plan" 2012 წლის დეკემბრის შუა რიცხვებში დაიწყო, მას შემდეგ, რაც კონექტიკუტის სკოლაში მასობრივი მკვლელობები მოხდა. ვიდეოში ცნობილი პიროვნებები იხსენებენ ყველაზე ფართომასშტაბიან მასობრივ მკვლელობებს, რომელიც უკანასკნელ წლებში მოხდა და ზომების მიღებას ითხოვენ, ძალადობის შესაჩერებლად.
ვიდეორგოლში მონაწილეობენ: ბიონსე, ამანდა პიტი, კრის როკი, ჯენიფერ ლოპესი, ჯესიკა ალბა, კორტნი კოკსი, ჯულიანა მური და სხვები. ვიდეოს უკვე 6 მილიონზე მეტი ნახვა აქვს. „იუთუბის" მომხმარებლებმა სასტიკად გააკრიტიკეს ვარსკვლავები და კომენტარებში გაიხსენეს, თუ კონკრეტული მსახიობი რომელ ფილმში თამაშობდა ძალადობისა და მკვლელობების სცენებში. იუზერები მსახიობებს ფარისევლებს უწოდებენ.
როგორც ცნობილია, მასობრივი მკვლელობა კონექტიკუტში 20 წლის ადამ ლენზამ ჩაიდინა, რომელმაც 20 ბავშვი და 7 მოზრდილი დახოცა. ტრაგედიის შემდეგ, ასიათასობით ამერიკელმა ხელი მოაწერა პეტიციას, სადაც ისინი ხელისუფლებას იარაღის შეძენაზე კანონის გამკაცრებას სთხოვენ.
