ვატიკანელმა არქიეპისკოპოსმა გერჰარდ ლუდვიგ მიულერმა, საუბრებს სამყაროს აღსასრულის შესახებ, უაზრო უწოდა. სასულიერო პირმა ეს განცხადება ვატიკანის რადიოთი გამოსვლისას გააკეთა. მიულერის თქმით, ეს ყველაფერი უსაგნო მღელვარებაა და ქრისტიანული ტრადიციით, არ არის მიღებული სამყაროს აღსასრულის კონკრეტული თარიღების დასახელება და განხილვა.
"თუ დავუშვებთ ალბათობას, ასე შეიძლება ყოველ წამს მოხდეს რაღაცა ისეთი, რის შედეგადაც უფლის წინაშე წარვსდგებით", - აცხადებს მიულერი. მისივე თქმით, 21 დეკემბერს მას მნიშვნელოვანი შეხვედრები აქვს დაგეგმილი.
კათოლიკე იერარქი მიიჩნევს, რომ თანამედროვე ადამიანებს უსაფუძველო მღელვარებები ბედნიერებაში უშლის ხელს. მან ყველა ქრისტიანს მოუწოდა, შობის დღესასწაულს ერთად შეხვდნენ და ბედნიერად და ოპტიმისტურად შეხედონ მომავალს.
აღსანიშნავია, რომ მაიას კალენდარი, რომელიც 2012 წლის 21 დეკემბერს მთავრდება, აქტუალურია ისეთ ქვეყნებშიც, სადაც ქრისტიანები უმრავლესობას შედგენენ. მაგალითად, ჩილეში ჩატარებული სოციოლოგიური კვლევების შედეგად ირკვევა, რომ მოსახლეობის უმრავლესობა 21-ში სამსახურში წასვლას არ აპირებს, 30 პროცენტი კი ხელმძღვანელობისაგან ხელფასების გაცემას 21 დეკემბრამდე ითხოვს.
სამყაროს აღსასრულის არ სჯერა ბუდისტი ბერების უმრავლესობასაც. ბუდისტი ლამები, შამბალის ორაკულისაგან განსხვავებით, მიიჩნევენ, რომ შიში სამყაროს აღსასრულის შესახებ უსაფუძვლოა.
მაიას კალენდარი ქალაქ ტორტუგეროში, მექსიკის შტატ ტაბარსკოში აღმოაჩინეს. კალენდარი სწორედ ამ თარიღით - 2012 წლის 21 დეკემბრით სრულდება, რამაც ეჭვი გააჩინა, რომ ამ დღეს დედამიწაზე სიცოცხლე წყდება. თუმცა მეცნიერები ამ ხმებს კატეგორიულად უარყოფენ. მაიას ტომის მკვლევარი ისტორიკოს-არქეოლოგები კი აცხადებენ, რომ მაიას ტომს საერთოდ არ ჰქონდა ცნება "სამყაროს აღსასრული", განსხვავებით სხვა ცივილიზაციებისაგან, ხოლო ნაპოვნი არტეფაქტი იმას მიუთითებს, რომ 2012 წლის 21 დეკემბერს, უბრალოდ, სრულდება ერთი ეპოქა და იწყება მეორე.