თბილისის მერი სკოლამდელი აღზრდის დაწესებულებების თანამშრომლებს შეხვდა და მათ საბავშვო ბაგა-ბაღების მართვის სააგენტოს ახალი ხელმძღვანელი - რამაზ სულამანიძე წარუდგინა. შეხვედრაზე გიგი უგულავამ თბილისის მერიის 2013 წლის მთავარ პრიორიტეტებზე, დაგეგმილი პროექტების განხორციელებასა და სამომავლო გეგმებზე ისაუბრა.
მომავალი წლიდან იმ დაწესებულებებში, რომელებსაც თბილისის მერია აფინანსებს, შრომითი ანაზღაურება 20%-ით გაიზრდება. 2013 წლიდან გაზრდილ ხელფასს აიღებენ: საბავშვო ბაღების, თბილისის სატრანსპორტო კომპანიის, სამედიცინო დახმარების ცენტრის, საგანგებო და გადაუდებელი სიტუაციების მართვის სააგენტოს, დასუფთავების სფეროსა და თბილისის თვითმმართველობის სტრუქტურების თანამშრომლები;
100%-ით განახლდება სასწრაფო დახმარების საავტომობილო პარკი, რეაბილიტაცია ჩაუტარდება სასწრაფო დახმარების ცენტრებს;
სპეციალური, 100 ლარიანი ვაუჩერით ისარგებლებს თბილისში რეგისტრირებული ყველა აბონენტი, სულ 350 000 ოჯახი;
250 ლარიან ვაუჩერს 45 000 სოციალურად დაუცველი ყველა ის ოჯახი მიიღებს, რომელთაც 70 000-მდე სარეიტინგო ქულა აქვთ მინიჭებული;
65%-ით იზრდება საბინაო ამხანაგობების ხელშეწყობის პროგრამის ბიუჯეტი;
გრძელდება გზების რეაბილიტაცია;
ქალაქის ყველა მუნიციპალიტეტში, თბილისელების მიერ ინიცირებული თითოეული ის პროექტი დაფინანსდება, რომელიც მოსახლეობის მხარდაჭერას მოიპოვებს;
600 000 თბილისელი მუნიციპალურ ტრანსპორტში სხვადასხვა სახის შეღავათებით ისარგებლებს;