ამერიკელი ბესი კუპერი, რომელიც პლანეტის ყველაზე მოხუც ქალად ითვლებოდა, 117 წლის ასაკში, საკუთარ სახლში, ჯორჯიის შტატის ქალაქ მონროში გარდაიცვალა. ამის შესახებ გაზეთი Huffington Post კუპერის ვაჟის, სიდნი კუპერის ინფორმაციაზე დაყრდნობით წერს.
ვაჟის განცხადებით, ბესი საშობაო ვიდეორგოლებს უყურებდა, მოულოდნელად სუნთქვა გაუძნელდა და შვილს ფანჯრის შეღება სთხოვა, რათა ცოტა ჰაერი შესულიყო, ცოტა ხანში კი გარდაიცვალა. ბესის ამ კვირაში დაკრძალავენ.
ბესი კუპერი, როგორც პლანეტის ყველაზე ხანდაზმული ქალი, გინესის რეკორდების წიგნში 2011 წლის იანვარში მოხვდა. მანამდე მასზე ასაკოვნად ბრაზილიელი მარია გომეს ვალენტინი ითვლებოდა, რომელიც კუპერზე 48 დღით უფროსი იყო, თუმცა შარშან ივნისში, მარიას გარდაცვალების შემდეგ, ბესი იქნა აღიარებული მსოფლიოს ყველაზე მოხუც ქალად.
„სი-ენ-ენის" ინფორმაციით, ბესი კუპერი 1896 წლის 26 აგვისტოს, ტენესის შტატში, ქალაქ სალივანში დაიბადა. სკოლაც იქ დაამთავრა და მასწავლებლად მუშაობდა, შემდეგ ჯორჯიის შტატში გადავიდა, სადაც იგივე საქმიანობა განაგრძო. 1924 წელს ის ცოლად გაჰყვა ლიუტერ კუპერს და მასთან 40 წელი გაატარა. ბესის 4 შვილი, 12 შვილიშვილი, 13 შვილთაშვილი და ორი შვილთაშვილის შვილი დარჩა.
„ბი-ბი-სის" ცნობით, ბესი კუპერის გარდაცვალების შემდეგ, დედამიწის ყველაზე ასაკოვანი ქალის ტიტული ამერიკელ იტალიელზე, დინი მანფრედინზე გადავიდა, რომელიც აიოვას შტატში ცხოვრობს და 115 წლისაა. ყველაზე მოხუცი მამაკაცი კი იაპონელი ძიროემონ კიმურია, რომელიც დინიზე ორი კვირით უმცროსია.