მოიერიშე თვითმფრინავ F-16-ების ჯგუფი თურქეთის ქალაქ დიარბექირში განთავსებულ სამხედრო ბაზაზე მზადყოფნაშია მოყვანილი. მიზეზი სირიის საზღვართან ვითარების გართულება გახდა.
როგორც თურქული პრესა იუწყება, სირიულმა თვითმფრინავებმა საზღვრისპირა ქალაქებში ამბოხებულების პოზიციებზე იერიში მიიტანეს. სამხედროებსა და ამბოხებულებს შორის შეტაკების შედეგად, რამდენიმე ყუმბარა თურქეთის ტერიტორიაზედაც დაეცა. აფეთქებებმა ადგილობრივ მოსახლეობაში პანიკა გამოიწვია. ინციდენტის შემდეგ, თურქეთმა სამხედრო თვითმფრინავების საბრძოლო მზადყოფნაში მოყვანა გადაწყვიტა.
დღესვე ხდება ცნობილი, რომ თურქეთის ტერიტორიაზე სარაკეტო კომპლექს "პეტრიოტის" ტიპის სარაკეტო დანადგარები, შესაძლოა, ექვსამდე გაიზარდოს. ამის შესახებ პრესას თავდაცვის უწყების წარმომადგენლებმა აცნობეს. მათი მონაცემებით, სარაკეტო კომპლექსებს 300-400 უცხოელი სამხედრო პირი მოემსახურება.
ამერიკის შეერთებული შტატების თავდაცვის უწყების მაღალჩინოსანი იუწყება, რომ თურქეთში "პეტრიოტის" რაკეტების განთავსებასთან დაკავშირებით გადაწყვეტილებას, ნატოს წევრ სახელმწიფოთა საგარეო საქმეთა მინისტრების შეხვედრის დროს მიიღებენ, რომელიც 4-5 დეკემბერს გაიმართება, თუმცა გადაწყვეტილების პრაქტიკული განხორციელება, შესაძლოა, რამდენიმე კვირით გაჭიანურდეს.
