ფონიჭალაში, აფეთქების შედეგად დაშავებული სამი ადამიანი, მათ შორის, ორი არასრულწლოვანი კვლავ კლინიკაში რჩება.
როგორც ინგოროყვას საუნივერსიტეტო კლინიკის პედიატრიული დეპარტამენტის ხელმძღვანელმა, ქეთი ბარაბაძემ განაცხადა, ორივე არასრულწლოვანი აქტიური და კონტაქტურია.
„თბილისში მომხდარი ტრაგედიის შედეგად, კლინიკის პედიატრიულ დეპარტამენტში შემოყვანილი 11 წლის ვაჟის მდგომარეობა კლინკაში შემოსვლისას იყო მძიმე, გამოხატული მრავლობითი ტრავმული დაზიანებით. კლინიკის ყბა-სახის ქირურგთა მიერ ჩატარდა სახის კონსტრუქციული ოპერაცია. პაციენტის სიმძიმის მდგომარეობიდან გამომდინარე, მოთავსდა პედიატრიული დეპარტამენტის რეანიმაციისა და ინტენსიური თერაპიის განყოფილებაში. მეორე პაციენტი, სამი წლის გოგონა კლინიკაში შემოსვლისას შეფასდა, როგორც არამძიმე მდგომარეობით. მოთავსდა პედიატრიულ პალატაში, თავიდანვე გამოხატული იყო მძიმე ფსიქოლოგიური სტრესის ზემოქმედება. მკურნალობაში თავიდანვე ჩაერთო ექიმთა მულტიპროფილური გუნდი, მეთვალყურეობას უწევს ფსიქოლოგი. დღეის მდგომარეობით, პაციენტის მდგომარეობა არის დამაკმაყოფილებელი, დინამიკაში გაუმჯობესებული. ორივე პაციენტი აქტიურია, შემოდის კონტაქტში, ადეკვატურად პასუხობენ კითხვებს“, – აღნიშნა ექიმმა.
რაც შეეხება 31 წლის მამაკაცს, რომლის ბინაშიც აფეთქება მოხდა, მისი მდგომარეობა კვლავ კრიტიკულად მძიმეა. დამწვრობის ცენტრის ინფორმაციით, პაციენტი რეანიმაციულ განყოფილებაში რჩება და მართვით სუნთქვაზე იმყოფება.
პაციენტი ისევ რჩება რეანიმაციაში, ისევ მართვით სუნთქვაზეა. სტაბილურობას ვინარჩუნებთ. დღევანდელი დილის მონაცემებით, მისი მდგომარეობა არის უცვლელი. ბუნებრივია, მისი მდგომარეობა უკიდურესად მძიმეა, მიუხედავად სტაბილიზაციისა, ის კვლავ მართვით სუნთქვაზე იმყოფება, - ამბობს ექიმი გუგა ქაშიბაძე.