15-20 წელიწადში მარსზე საცხოვრებლად პირველი ახალმოსახლეები გაეგმზავრებიან. 80 ათასი ადამიანის "წითელ პლანეტაზე" განსახლებას ცნობილი მილიარდერი, ელონ მასკი უზრუნველყოფს. მასკი კოსმოსური კომპანიის, SpaceX-ის დამფუძნებელი და გენერალური დირექტორია. თავისი გეგმების შესახებ, ელონ მასკმა განცხადება ლონდონში, აერონავტიკის სამეფო საზოგადოების სხდომაზე გააკეთა. ბრიტანული მედიის ინფორმაციით, მილიარდერი დარწმუნებულია, რომ მის კოპანიას შეუძლია ხომალდის აგება და მეზობელ პლანეტაზე ხალხის გადაყვანა.
კოსმოსური კომპანიის ხელმძღვანელს მარსზე მთელი ქალაქის გაშენება სურს. იმისთვის, რომ გახდეთ მარსის კოლონიის მცხოვრებლები, ანგარიშზე უნდა გქონდეთ სულ მცირე 500 ათასი დოლარი, რაც არც ისე დიდი თანხაა, მით უმეტეს, თუ მსოფლიოს დიდ ქალაქებში ბინების ფასებს გავითვალისწინებთ.
პირველი ჯგუფი, რომელსაც მილიარდერი მარსზე გაგზავნის, მხოლოდ ათი კაცისგან დაკომპლექტდება. მათ მნიშვნელოვან ამოცანას დაუსახავენ: კერძოდ, ისეთი ინფრასტრუქტურის განვითარებას, რომელიც პირველი ახალმოსახლეებისთვის სასიცოცხლოდ აუცილებელი იქნება. ასტრონავტი ედვინ ოდრინი ირწმუნება, რომ ისინი, ვინც მარსზე გადასახლებას გადაწყვეტენ, უკან დაბრუნებას აღარ მოისურვებენ.
მარსის ათვისების გეგმებზე აქტიურად მუშაობს "ნასაც", რომელიც ამ მიმართულებით ყოველწლიურად მილიარდობით დოლარს ხარჯავს. ოქტომბრის დასწყისში ცნობილი გახდა, რომ წარმატებით დასრულდა Curiosity-ის გამოცდა, ხოლო მოგვიანებით გაირკვა, რომ საერთაშორისო კოსმოსური სააგენტო მთვარის მეორე მხარეს კოსმოსური ბაზის აშენებასაც გეგმავს, რომელიც მარსზე მიმავლებს გამოადგებათ. მსგავს იდეებს მხარს უჭერს ამერიკის შეერთებული შტატების პრეზიდენტი, ბარაკ ობამა, განსხვავებით, თავისი ყოფილი კონკურენტის, მით რომისაგან, რომელმაც მეცნიერებისთვის ხარჯების შემცირების საკითხი დააყენა.
